FCSA minister-in weighbridge bunna tur enfiah

Food, Civil Supplies & Consumer Affairs (FCSA) minister K Lalrinliana chuan nimin khan Zuangtui Venga an department kudama digital weighbridge bunna tur a enfiah.

K Lalrinliana chuan Zuangtui kudama weighbridge hmanlai April, 2020-a a chhiat khan khawl thar leh ṭha zawk, hman nuam leh awlsam digital weighbridge-a thlak tumin ruahmanna an siam tih sawiin, "Covid-19 vangin harsatna kan tawk a, kan duh aiin kan inpeih har ta a ni," a ti a, kudam chu hmun dangah sawn chhuah tum a nih thu leh a hmun tur pawh tihfel thuai a nih a beiseiawm tawh tih a sawi.

Sorkar thuchhuah tarlan danin, ration buhfai mipui hnenah dik taka pek chhuah a nih theih nan FCSCA department chuan buhfai phurtu lirthei (truck) chawpa buhfai bukna ṭha leh awlsam digital weighbridge pahnih Zuangtui kudama dah turin hma a la a, hemi atan hian sorkarin SEDP hnuai aṭangin fund pawh a pe tawh a ni.

Weighbridge te hi Leotronic Scale Private Limited, Amritsar, Punjab-te'n an rawn supply a, a pahnih leina man Rs 21,68,84 aṭangin 95% pek tawh niin, a balance 5% hi weighbridge hawn a nih hnuah pek a ni ang.

Tun dinhmunah Zuangtui leh Luangmual, Lunglei kudama weighbridges bunna atana civil foundation leh control room-te peih a nih tawh a, Leotronic hotute chu installation leh a ṭul dangte a rang lama rawn ti tura ngen leh hriattir an ni.