Kawng chhe chungchang thlen

Congress party zirlai pawl NSUI hruaitute chuan nimin khan PWD engineer-in-chief Bowmen-a chu a pisaah an kawm a, kawng chhe chungchang an thlen.

NSUI hian an president RB Lalmalsawma hmingin World Bank road Hualngohmun khaw hnuai BN Nursing Hostel bul kawng chhe lutuk siamṭha tura ngenna an lo siam tawh a, hei hi nimin khan an ngaihven leh a ni. Lunglei Road ,Tlawng leh Pukpui inkar kawng chhe lutuk leh Mizoram hmun hrang hranga kawngpui siamtu contractor ṭhenkhat hnathawh muang lutuk chungchang an thlen bawk.

PWD E-in-C hian Hualngohmun khaw hnuai bul chu siamṭhatna tur sum a awm tawh thu leh ruahtui a tlak leh ṭhin avanga a chhak lam a min belh ṭhin avangin hna chawlhsan rih a nih thu a lo hrilh nia sawiin NSUI chuan, "Chak taka hmala turin theihtawp an chhuah tur thu a sawi a ni," an ti.

NSUI tarlan danin, PWD E-in-C hian Lunglei road Tlawng leh Pukpui inkar kawng chu a chhiat zin em avangin a zirchiang tutur an din tawh.