YEJM-ten environment humhim turin an tih theih zawng zawng tihzel tum

Youth for Environment Justice Mizoram (YEJM) chuan nimin khan thuchhuah siamin, Mizorama hmasawnna hnathawh vanga environment dan bawhchhiatna an dodal zel dawn thu leh environment humhim turin an tih theih zawng zawng tih zel an tum thu an tarlang.

YEJM chuan, National Highway & Infrastructure Development Corporation Limited (NHIDCL) in kawng an laihna hmun hrang hrang - NH-06 (Seling - Zokhawthar), NH-102B (Keifang - Manipur), NH-302 (Lunglei - Tlabung) leh NH-54 (Aizawl - Tuipang)-ah te ram leilung fa leh environment zahna an nei lo niin an tarlang a, "Dan loa an kawng laih vung an paih in kan thing leh mau, kan ramhmul leh hnim chhiarsên loh a chhilh a, a hmuna nungcha cheng an chimit vek. An kawng laihna hmun apiangah kan luikawr leh luite 99% an chhilh a, an leivung paih chu ruah rawn surin chirhdiakah a chang a, kan luipui zawng zawngah chirhdiak chu a luang lut a, luia nungchate tan dam khawchhuah ngaihna a awm lo," an ti a, lo leh huan neitu tam tak eizawnna a tih chhiat thu an tarlang.

Ram leilung fate leh environment humhim turin hman an lak fo tawh thu leh Environment Forest & Climate Change (EFCC) department hnenah pawh ngenna an siam tawh thu te tarlangin YEJM chuan, "EFCC department-te’n dan anga hma an lakna hi lawmawm kan ti hle a, chutihrualin NHIDCL hnuaia kawng laitute’n kan ram hmasawnna tura hna an thawhnaah hian dan an bawhchhiat nasat em avangin hmasawnna khingbai tak min hnutchhiah tur leh kan ram leilung thing leh mau nungcha leh luite hi hmasawnna umna avanga dah kham an ni ta mai hi a rilru natthlak a, a dawn tawithlak kan ti a ni," an ti.

Environment humhalh hian tlai luat a neih loh thu te, mahni ram leilung leh a hausakna humhalh chu mi tin koa innghat a nih thu te, environment dan leh hrai zawm chungin kawng a laih theih thu te, hmasawnna dang pawh a thawh theih thute leh nawmsak duh luat vanga chhia leh ṭha hriatna phum boa a awm an phal loh thute an tarlang bawk.