Covid-19 positive enkawl mek 184 awm

September 18, Pathianni khan Mizoramah Covid-19 vei mi pariat hmuh chhuah a ni a, nimin khan hripui vei dam tawh mi 38 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 184 an awm.

Pathiannia hripui vei hmuh thar mi pariat chu mipa pasarih leh hmeichhia pakhat niin, RAT hmanga hmuh chhuah vek an ni a, swab sample 101 endik aṭanga positive zat chu 7.92% a ni.

Nimin khan hripui vei dam tawh mi 38 an chhuak a; district tina chhuak zat chu - Aizawlah 12, Mamitah 10, Lungleiah panga, Saitualah pakhat, Champhaiah pali leh Serchhip paruk an ni.

IDSP record angin, Mizoramah Covid-19 vei 2,38,051 hmuh chhuah a ni tawh a, mipa 1,10,883 leh hmeichhia 1,27,168 an ni a, mipa aiin hmeichhia 16,285-in an tam zawk. Nimin tlai dar 5 thleng khan mi 2,37,145 (99.62%) chhuahtir an ni tawh a, mi 722 (0.30%) thi tawhin, enkawl mek mi 184 (0.08%) an awm.

Kum 2011 chhiarpui angin, Covid-19 vei hmuh tawh 2,37,846 chu state mipui zat aṭangin 21.80% a tling a, India rama state zingah a sang ber. Mi 1,000 zelah positive 217 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.