Serkhan-Bagha kawng thubuaiah thuhretu 18 thu zawhfiah a ni tawh

Serkhan-Bagha kawng siamnaa sum tichingpena inpuhna thubuai chu Aizawl & District Session Court-a special judge Lucy Lalrinthari'n a ngaihtuah mek a, nimin thleng khan thuhretu 18 thu zawhfiah a ni tawh.

Serkhan-Bagha kawng siamnaah sum hman dan dik lo awma hriat vangin Hmarphei Zirlai Pawl (HZP) president B Vanlaltana chuan November 3, 2009 khan Anti Corruption Bureau (ACB)-ah FIR a thehlut a; ACB-in an chhui chian hnuah November 12, 2009-ah criminal case an ziak lut.

He thubuaiah hian PWD engineer-in-chief hlui pahnih - Liansanga leh Lianchungnunga (khatih laia PWD chief engineer) chu sum tichingpenah puh an ni a; PWD E-in-C pisaa thawk B Lalthanpuia chu dik lo taka document siamah puh a ni bawk.

ACB-in an chhuina aṭanga a lan danin, Serkhan-Bagha kawng siamna atan leh lei siamna atan hian kum 2006-2009 chhungin cheng nuai 1,053 pek (sanction) a ni.

Nuai 1,053 aṭang hian Liansanga chu cheng nuai 107.25 tihchingpen bakah, a thuneihna hmang sual a, 13th. Finance Commission kaihhruaina zâwm loa Serkhan-Bagha kawng siamna tur cheng nuai 260.81 chu hmun danga hman tura pawt pêngah puh a ni.

Lianchungnunga pawh cheng nuai 107 tichingpena puh a ni. Puh a nih chhan chu, ACB hnena lehkha a thawnah, he kawng siamna tur sum cheng nuai 107 chu a lapse angin a tarlang a, AG, Aizawl lehkhaah chuan sumte chu hman vek anga tarlan a ni thung.

B Lalthanpuia chu allocation dik lo taka siamah puh a ni thung. ACB tarlan danin, B Lalthanpuia hian dik lo takin allocation a siam tih a pha lo a; a sawi dan chuan, LOC paruk leh allocation lem pahnih a siam.

He mi atan hian signature lem a siam bakah, LOC lama hriatna nei lo PWD-a Joint Director of Accounts chu LOC lem a siam chu a dik tiin hming a ziah hnantir a ni.

Thubuai hi Special Court-in a zir chian hnuah ngaihtuah zui zel tlakah a ngai a, thuhretu mi 18-te thu a zawtfiah tawh. Chargesheet-a hming tarlan - Liansanga, Lianchungnunga leh B Lalthanpuia te pawh Nilaini leh nimin khan Court-ah an inlan a, thu zawhfiah an ni.

He thubuaiah hian thuhretu 57 an awm a, pakhat chu a thih tawh avangin 56 koh an ni dawn. A tahtawlin Court chuan thuhretute thu zawhfiah turin a ko mek a ni.