Parliamentary secretary-te bàn chhan Court thupek hlauhthawn vangah ngai

MNF hruaitu, Law & Judi­cial minister ṭhin H Rammawi chuan, Congress party kaihhruai sorkara parliamentary secretary pasarihte'n August 30, 2017-a bànna an thehluh chu Court thupek an hlauhthawn vang a nih thu a sawi.

H Rammawi hian nimin khan Aizawl Press Club-ah thuthar theh­darhtute a kâwm a; "Kan parlia­mentary secretary-te bànna chhan kha Court order vanga báng nih ai chuan, tiin an báng ta dial niin MNF party chuan a ngai," a ti a, parlia­mentary secretary-te ruatna dan chu paih a nih theih nan High Court-ah an bawhzui zel dawn tih a sawi a ni.

H Rammawi sawi danin, Mizo­­ram sorkar, Congress party kaih­hruaiin kum 2009-ah The Mizoram Parliamentaries (Appoint­ment, Salaries, Allowances and Miscellaneous Provisions) Act, 2009 a siam a; chu dan hmang chuan parliamentary secretary ruat a ni a, dan siam (pass) a nih hmain Congress sorkarin parliamentary secretary dahin, minister of state dinhmun ang (rank) pek an ni.

The Mizoram Parliamentaries (Appointment, Salaries, Allo­wances and Miscellaneous Pro­visions) Act, 2009 chu India Con­stitution Article 164 (1A) kalh a nia an ngaih avangin H Rammawi hian Gauhati High Court-ah a khing a, a ukil chu C Lalramzauva a ni.

Gauhati HC chuan Parliamen­tary secretary ruatna dan siam ve tho Assam leh Nagaland sorkarte chu Supreme Court-ah khin mek leh ngaihtuah mek a nih avangin Gauhati HC chuan H Rammawi petition chungchangah Supreme Court thutlukna nghah ni se, thutlukna a awm hnuah ngaihtuah turin party-te ve vein 'mention' an dil thei ang, tiin November 5, 2009-ah order a siam.

H Rammawi chuan, India Parliament-in Constitution siamṭhain, sorkar laipui leh state sorkara minister awm thei zat a bithliah tih sawiin, chu chu minister-te enkawlna atana sum sen tam lutuk tihtlemna tur a nih thu a sawi a, "Mizoramah pawh financial crisis kan tawh mek lai hian, kan parliamentary secretary-te minister of state ang thlapa enkawl nan kum 2009 aṭanga tun thlengin cheng nuai 3,000 chuang Mizoram sorkarin a sêng tawhin a lang," a ti.

Supreme Court-in Assam Par­liamentaries Act, 2004 chu Constitution kalh a ni, tiin July 26, 2017-ah a paih (quash) tih sawiin Rammawi chuan, "Mizoram Parliamentaries Act, 2009 pawh kalphung inang an nih avangin unconstitutional a ni tih a chiang nghal mai," a ti a; Court thupek hmuh hmain Mizoram parlia­mentary secretary-te chu an báng ta ni ngeia an ngaih thu a sawi.

H Rammawi chuan, Gauhati High Court-ah The Mizoram Parliamentaries Act chu paih (quash) turin hma an la mek tih sawiin, "Kan ukil C Lalramzauva'n August 18, 2017 khan Gauhati HC-ah hma a la ṭan... Gauhati HC Principal Seat-a kan thu ngaihtuah tura kan ukilin a dilna pawh Gauhati HC-in min phalsak tawh. Tunah hian kan advocate TJ Lalnuntluanga'n Gauhati-ah a chàm chilh mek a ni," a ti.

Zawhna chhangin Rammawi chuan, Supreme Court-in Assam sorkar dan a paih chuan Mizoram leh state dang, parliamentary secretary neite dan nghawng nghal mah se, High Court-in Mizoram dan bik chu a la paih ve a ngaih thu a sawi a, "High Court aṭangin kan sorkar hian order a hmuh thuai kan ring," a ti a; Mizoramah Congress sorkara parliamentary secretary ruatna dan khin a nih laiin, Nagaland-ah chuan Congress party MLA-in a khing thung tih a sawi bawk.