Court-in naupang khuaikhemtu a hrem

Naupang kumtlinglo khuaikhemtu, Malsawm­tluanga (24) Dinthar, Aizawl chu Special Judge (Protection of Children from Sexual Offences Act) chuan kum 10 chhung táng tur leh Rs. 1,000 chawi turin a hrem.

Sorkar ukil H Lal­muan­kima hnen aṭanga thu dawn danin, Malsawmtluanga hian May 4, 2014 tlai khan Aizawl veng pakhata hmeichhe naupang kum 7 mi chu a ṭhiante nen an infiam lai thil leisak tura thlêmin hmun finrialah a kalpui a, a khuaikhem a ni.

Vanduaina tâwk hmeichhe naupang nuin Vaivakawn Police Station-ah thubuai a thehlut a, May 4, 2014 zanah Mal-sawmtluanga chu YMA hruaitute'n an man hnuah Police kutah an hlan.

Thubuai ngaihtuahtu Special Judge (Protection of Children from Sexual Offences Act) chuan, thil tisualtua puh leh thuhretu hrang hrangte thu a zawhfiahna leh, doctor-in a endikna aṭangin Malsawmtluanga chu a inhnamhnawih ngei tih a finfiah.

Court chuan kum 10 chhung táng tur leh Rs. 1,000 chawi turin a ti a, pawisa chawi tur hi a pek loh chuan ni 10 dang a tàn belh ang.