Zirna lama hmasawnna lian tham awm turin theihtawp chhuah a ni - CM

Chief minister Lal Thanhawla chuan, zirna lamah hmasawnna lian tham a awm theih nan theihtawp chhuah a nih thu a sawi. He thu hi CM hian Mizo Zaimi Inzawmkhawm (MZI)-in August 30, Nilaini zana Berawtlanga MZI din champha vawi 37-na an lawmnaah a sawi a ni.

Chief Minister chuan, sorkarin ṭhalaite tana khawvel thar a siam mekah, a bikin infiamna khawvelah hlawhtlinna nasa tak a awm mek tih a sawi a, "Zirna lamah pawh hmasawnna lian tham awm turin theihpatawp chhuah mek a ni. Mizo mipuiin an thiam leh ngainat, rimawi khawvelah pawh ṭhalai talent nei ṭha tam tak an awm a, anni tihhmasawnna leh chawikan nan sorkarin ngaihtuahna a sêng mek a ni," a ti.

Hmarchhak state ṭhenkhat - Sikkim leh Meghalaya ṭhalaite'n rimawi vanga eizawnna bakah, hausakna an hmuh theih chuan anni aia theihna leh thiamna nei ṭha zawk anga miten an ngaih Mizo ṭhalaite an hlawhtlin lohna tur a awm bik lo tih sawiin Lal Thanhawla chuan, "Rimawi khawvela Zo fate hlawhtlinna tur chuan hnam dang ṭawng thiam, hnam dang culture hriat leh hnam dang hriat lâr tura feh chhuah leh inpholan tam a pawimawh," a ti a; rimawi lama talent nei ṭha, hlawhtlin tuma bei, puih ngaite chu sorkarin a puih tur thua sawi.

CM Hawla chuan, Mizoram chhung kil tinah, thingtlang khaw tê zawkah pawh zaipawl ṭha tak tak an awm vek tih sawiin, "Keini ang hi state mai ni lo, ram pum ang pawhin khawvel hmun dangah an tam lo mai thei. Hei hian rimawi kan hmelhriatna a rei loh ang hûin rimawiah kan sanzia a ti lang. Bollywood-ah te pawh playback singer-te hausakzia kan hria a, anni tih ang tih theih tum leh kawng dap hi Zofate tana chonna thar ni se ka duh," a ti.

Chief Minister hian tuilian vanga ṭanpui ngaite puala MZI-in charity event hrang hrang a buatsaih zinga HELP Rock For Mizoram Concert music video album a tlangzarh nghal a ni.

MZI din champha lawmna hi an president Lalrinmawia Ralte-in a kaihruai a, MZI member, kumina thi Michael M Sailo leh JH Lalmuanpuii te sûnna hun an hmang a ni.