December 31, 2017 ral hmain Bank account leh Aadhaar thlun zawm tur

Aizawla lead bank, State Bank of India (SBI) chuan thuchhuah siamin, January 1, 2018 aṭangin bank account leh Aadhaar number thlun zawm (link) lote tan bank account khawih chet theih a nih tawh dawn loh avangin, bank account nei zawng zawngte tan December 31, 2017 ral hmain account number leh Aadhaar number thlun zawm ngei a ngaih thu an tarlang.

SBI chuan, bank account leh Aadhaar number thlun zawm chungchangah hian August 25, 2017 khan Aizawl DC Kannan Gopinathan kaihhruaiin Aizawla bank manager-te an ṭhukhawm thu tarlangin, "India sorkara Ministry of Finance hnuaia Department of Financial Services aṭanga bank account leh Aadhaar number thlun zawm chungchanga hriattirna bawhzui leh Aizawl district-a hmalak dan turte sawiho a ni," an ti.

Aizawl DC sawi danin, Ministry of Finance (Department of Revenue) Notification no. G.S.R. 538(E) dated 1.6.2017 chuan Prevention of Money-Laundering (Maintenance of Records) Rules, 2005 a siamṭha a, chumi ang chuan bank account nei zawng zawngte’n Aadhaar number nen thlun zawm vek tura tih a ni a; nakkum January 1 aṭangin Aadhaar number nena thlun zawmte chauh khawih chet tawh tura tih a ni.

Kannan Gopinathan chuan, bank account nei zawng zawngte'n an account leh Aadhaar an thlun zawm vek theih nan customer-te’n bank hnathawkte chu ṭan la turin a chah a, "Aadhaar number leh bank account thlun zawm hi bank hnathawkte mawhphurhna a ni," a ti.

Meeting-a an thurelte
1. Aizawl district-a bank account nei zawng zawngte'n November 30, 2017 ral hma ngeiin an Aadhaar number bank account an neih zawng zawng nena thlunzawm turin account an neihna bank-ah consent form thehluh ṭheuh tur a ni.
2. Local council leh village council zawng zawngte hnenah LC/VC area chhunga bank account nei zawng zawngte November 30, 2017 ral hma ngeiin an Aadhaar number chu an bank account nena thlunzawm turin account an neihna bank-ah consent form thehlut ṭheuh turin tlangaua lo puangdarh tur a ngenna siam ni se.
3. Bank zawng zawngte’n customer-te hnenah November 30, 2017 ral hma ngeia bank-a kal a, Aadhaar number thehlut turin phone hmang leh a theih angin an awmna a kal chilh hial pawha hrilh vek ni se.
4. November 30, 2017 thlenga Aadhaar number thehluh zawng zawngte chu bank manager-te’n December 31, 2017 ral hma ngeiin account nen lo thlunzawm a, bank account record chu UIDAI record nen endik tawnin, customer hming, address leh pian nite a ṭul anga lo tihdik vek ni se.
5. Bank branch zawng zawngte'n mahni branch awmna veng/khua leh service area chhungah bank account leh Aadhaar number thlun zawm chungchang a tam thei anga town hall meeting neih ṭheuh ni se. Bank/branch inhnaih deuha awmte chuan intiam ruala meeting neih ni se.