Home minister-in Fire Station building hawng

Khatlaa Fire Station building thar chu nimin khan Home minister R Lalzirliana'n a hawng. Building hi 13th. Finance Commission Award 2010-14 sum aṭanga sak a ni.

Home Minister chuan, police leh sorkarin sual dona kawngah an thawk ṭha hle tih sawiin, "Sual hi a pung thar ta hluai a ni lo a, tunah chuan inbiakpawhna leh thu thar dawnnate a ran tawh avang leh puanzar zel a nih tawh avangin mi tinin an hre thei tawh zawk a ni," a ti.

Mipuiin police-te an ring tlat tih sawiin R Lal­zirliana chuan, "Hei hi a hriatna chu, tunah hian khaw tin deuh thawin police station an khuaa dah turin an ngen a ni," a ti a; police station inrelbawl dan duan ṭhat zel a nih thu a sawi.

Fire Station Building hawnnaah hian minister PC Lalthanliana bakah, MLA pathum - Hmingdailova Khiangte, TT Zothansanga leh Lalruatkima te pawh an tel.

Khatlaa Police headquarters rama Fire Station building sak hna hi PWD Project Division-1 enkawlna hnuaiah thawh a ni a, a sakna tura sum ruahman chu Rs. 2,16,20,978 a ni.