SBM hnuaia Mamita hmalakna thlirho

Mamit District Water and Sanitation Committee on Swachh Bharat Mission (Gramin) chu nimin khan an chairman Lalbiaksangi, Mamit DC hoin DC conference hall-ah an ṭhukhawm a, Swachh Bharat Mission (Gramin) hnuaia hmalakna an thlirho.

Lalbiaksangi'n a sawm angin, PHE chief engineer C Lallunghnema chuan, SBM(G) hnuaia hmalakna hrang hrang a sawifiah a, "India ram hi ram hrisel leh fai kan nih theihna turin nasa taka hmalak a ni a. October 2019-ah chuan ram pumpui chu páwn lêra inthiar awm lohna, open defecation free (ODF)-a siam tum niin, Prime Minister pawhin a ngai pawimawh hle a ni," a ti.

PHE executive engineer Lalzawmliana chuan, tun dinhmuna Mamit district-a SBM hmalakna leh hma­chhawpte tarlangin, "Fûr a nih vanga inkalpawhna lam harsatna avangin duhthusama hmalak a harsa hle," a ti a; khaw ṭhat hunah hmabak la awmte chak taka kalpui a beisei thu a sawi.

Lalzawmliana sawi danin, Mamit district-ah hian RD block pathum - Reiek, West Phaileng leh Zawlnuam block- ah hmalakna kalpui a ni tawh. Reiek block aṭangin khaw 22-ah ek-in 607 sak turah 535 sak zawh tawh a ni a, West Phaileng block-a khaw 23-a ek-in 2,884 sak tura ruahmanah 607 sak zawh tawh a ni. Zawlnuam block chhunga khaw 44-ah ek-in 2,299 sak turah 602 sak zawh tawh a ni bawk.