MPCY-in Bairabi kawng siam vat phût
MPC ṭhalaite chuan Mizoram Truck Owners Association (MTOA) leh Mizoram Truck Drivers Association (MTDA) ten an phût angin, Bairabi kawngpui chu siam ṭha thuai turin Mizoram sorkar an phût.
MPCY chuan thuchhuah siamin, Mizorama kawngpui pawimawh ber zinga mi, eibar lak luhna Bairabi kawng Mizoram sorkarin a enkawl zawh loh vanga MTOA leh MTDA-te'n September 10, 2017 thlenga siamṭhat a nih loh chuan truck tlantir an tum tawh loh thu an puang chu pawi an tih thu an tarlang a, "Congress sorkarin ram leh mipuite a ngaihthahzia a tihlanna chiang takah kan ngai. MTOA leh MTDA-in an phût hi a rang thei ang bera tihhlawhtlinsak turin Mizoram sorkar kan phût a ni," an ti.
Food, Civil Supply & Consumer Affairs (FCSCA) carring contructor-te hnuaia MTOA leh MTDA-te'n buhfai an phurh mekah, sorkarin tender thar chhuah a, man sang zawka a phurhtir dawn loh chuan September 1, 2017 aṭanga buhfai an phurh tawh dawn loh thu an sawi chungchangah MPCY chuan, mipuiin harsatna lian an tawh hma ngeia MTOA leh MTDA beisei leh phûtte tihhlawhtlinsak turin sorkar an phût bawk.