KHAWTHLIR

Roll ennawn hun
Election Commission of India (ECI) chuan kumina electoral roll siamṭhatna, Special Summary Revision 2018 tih hun a siam a; electoral roll thar chu January 15, 2018-ah tihchhuah a ni dawn. ECI-in ruahmanna a siam dan chuan, September 15, 2017-ah draft roll tlangzarh a ni dawn a, draft roll tihchhuah aṭanga October 13 thleng sawiselna/dilna hun hawn a ni ang. Polling station tina hming chuangte chu khua/veng tinah September 16 leh September 30-ah endik a ni ang a, dilna leh sawiselnate chu ERO/AERO-te'n November 10-ah an enfiah dawn a ni.

Tanpuina sem
AH & Vety department chuan, nimin khan Kolasib-ah NLUP-NEDP convergence ṭanpuina dawng tur thlante hnenah ṭanpuina an sem. Ṭanpuina hi vawk vulh thlangtu mi 16 leh ar vulh thlangtu mi pali hnenah sem a ni a; ran in sakna tur, hmanraw leina tur leh a hmunhma buatsaihna tur a ni.

HBC Week khâr
Hrangbana College-in Week an hman chu nimin khan an college golden hall-ah a khârna inkhawm an hmang a; khuallian, minister Lal Thanzara chuan, zirna chu zirlaibua behchhana zir thiamna ringawt ni loin, mihring nun pumpui hmasawnna keng tel a nih thu a sawi. Hrangbana College hi kum 1980-ah din a ni a, zirtirtu 70, thawktu dang 20 leh zirlai 1,758 an awm mek a ni.

Ruang hmu
August 29-a Buichali lei thlen hmaa, lirthei chesual Tlawng luia tlaa chuang zinga mi chin hriat loa awm hnam dang pakhat ruang chu nimin khan a tlakna aṭanga kms. 10 velah hmuh a ni. He chetsualna-ah hian motor-a chuang zinga mi hnam dang pahnih chu chin hriat loin an awm a, pakhat hi zawn zui mek a ni.