NH 54 kawng a chhia; Lirthei an ding Thawm ṭhat hna an thawk ṭan mek
Tunlai hian Khàmráng leh Kolasib inkar National Highway-54 kawngpui chu hmun eng emaw zatah a chhia a, lirthei tam tak an tàn ṭhin bakah, lirthei ṭhenkhat chu kawngpuiah an let/tlu fo a; Khamrang lamah phei chuan lirthei an tlân ṭha ngam tawh lo. Hetih lai hian, kawng chhe laite chu thawmṭhat hna thawh ṭan a ni.
PWD hotute hnen aṭanga thu dawn danin, NH-54 kawngpui hi National Highways and Infrastructure Development Corporation (NHIDCL) kutah hlan a ni tawh. NHIDCL hian Khamrang - Lailapur inkar chu hmun ngaah ṭhenin, thawm ṭha turin tender an tichhuak a, JR Construction-in hmun pali leh C Lalhluna'n hmun pakhat an chháng. C Lalhluna chuan a hna chan chhung Bualpui bul vel (km. 106.500 - 123) inkarah hna a thawk ṭan tawh a; JR Construction chu NHIDCL-in Buichali hnaih lamah an hna páwn lam an khawihtir avangin an hna tur an la khawih thei lo. Kawng chhe zual lai Leitan (Kolasib) - Thingdawl pawh JR Construction khawih tur a ni. Hetih lai hian, Kolasib leh Rengtekawn inkar kawng NHIDCL-in thawm ṭhat tur tender a chhuah zinga tel lo chu tunlai hian lirthei tlân vel hrehawm khawpin kawng a chhe hle nia thu dawn a ni.