Hoarding, banner leh poster-te AMC-in an senghawi mek

Aizawl Municipal Corporation (AMC) chuan an dan siam, Display of Advertisement and Hoarding Regulation 2013 angin tunlai hian hma an la mek a, AMC aṭanga phalma (permit) la loa hoarding, banner leh poster tàrte chu an senghawi mek.

AMC commissioner Dr H Lalthlang­liana chuan zawhna chhangin, Display of Advertisement and Hoarding Regu­lation 2013 hnuaia permit pek anga tàr ni lo hoarding, poster leh banner tàr senghawi hna hi August 28, 2017-ah an thawk ṭan tih a sawi a, "Dan loa tàr 185 kan hmu tawh a, chu'ng zinga 84 chu kan senghawi (demolish) nghal a ni," a ti.

Dr H Lalthlangliana chuan, phalna tel loa hoarding, banner leh poster târte zinga 'X AMC' tih ziahte chu a tártute hnena phalna la tura hriattirna ang deuh a nih thu sawiin, "Permit lak an ngaihsak lo hrim hrim hi rawn ngaihsak se kan tihna a ni ber," a ti a; chutih rualin, miin an mimal building-a an tar chu danin a huam lo a, vantlang hmuna mite a huam deuh bik tih a sawi.

Durtlang lama kohhran leh KṬP-te'n Pathian thu leh nun dan ṭha mipui zirtirna lam hawi an târte pawh tihchhiat a nih chungchangah H Lalthlangliana chuan, Pathian thu leh thu ṭha tihchhiat tumna a ni lo tih a sawi a, "Pathian thu tihbawrhbân hi kan tum a ni lo a, kan naute'n an tih danah kan lo tifuh chiah lo a ni. Tukinah (nimin zing) kan review nghal a ni," a ti.

AMC Commissioner chuan, hoar­ding, banner leh poster-te târ turin dan anga phalna lak a ngai tawh tih a sawi a; inkhawmpui velah biak-in pâwn lam, kawngpui velahte banner tar dawn pawhin phalna lak a ngai tih a sawi a; AMC-ah dan angin permit la zel tawh se an duh.

AMC hotute chuan, Display of Advertisement and Hoarding Regulation 2013 chuan sumdawnna thil leh inthilte bakah, Pathian thu tárte pawh a huam thei niin an sawi a; inkhawmpui banner, páwn lama tarte pawh a huam theih avangin, kohhran ṭhalai pawl ṭhenkhat chuan AMC-ah permit an dil tawh ṭhin thu an sawi bawk.

AMC-a thawkte sawi danin, Display of Advertisement and Hoarding Regu­lation 2013 chungchangah hian kum 2013 aṭangin chanchinbuah vawi eng emaw zat mipui hriattirna an chhuah tawh.

An chhuah hnuhnun ber chu July 26, 2017-ah a ni a, chutah chuan August 15, 2017 thleng hun pek niin, hun pek a ral tawh avangin hma an la ta a ni. July 27-a hriattirna chhuah hnuhnun ber aṭanga August 15 inkarah hoarding, banner leh poster târ zingah AMC-a phalna dil an awm lo.

Biak-in páwn lama inkhawmpui banner tár turin phalna lak a ngai a, permission fee pek a ngaih bakah, security deposit Rs. 2,000 pek a ngai.

Security deposit hi chu banner senghawi hnuah AMC-in an pe lêt leh ṭhin a, banner tártute'n an banner an senghawi loh a, AMC lamin an senghawi erawh chuan pek let theih a ni lo thung. Hetih lai hian, Aizawlah hian 'No hoarding zone' a awm bawk.

Phalna nei loa tàr hoarding, banner, poster, etc. senghawi hna hi August 28, 2017-ah ṭan a ni a, enfiah turin ni tin AMC-a thawkte an chhuak ṭhin. Kar leh lamah pawh kar tluana enfiah a la ngai turah an ngai.

AMC hotute chuan, chanchinbu hmanga public notice chhuah bak dan chungchang mipui hriattir theih dan a van thu an sawi.