Sorkar a kal chak zawk nan Parl. Secy. ruat kan ni - CM

Chief minister Lal Thanhawla chuan, a kaih­hruai sorkara parlia­men­tary secretary ruat a nih chhan chu, ṭha tak leh chak zawka hnathawh a nih theihna atan a nih thu a sawi.

Lal Thanhawla hian nimin khan Congress Bhavan-ah thu a sawi a, parliamentary secretary chungchang sawiin, zahawm takin sorkar kal se tih chu an duh dan a nih thu a sawi a, "Minis­ter-te pawhin puitu ṭha tak tak neiin, hna ṭha takin thawk se kan duh. Chu­vangin, ram rawng ṭha taka bâwl a nih theih­na atan parliamen­tary secre­tary hi ruat an ni. Kan thawhho chhungin kan ṭang­­kai­pui em em a ni," a ti.

Minister-te chu mi ṭha leh fel ber ber an nih bik loh thu sawiin CM Hawla chuan, "Ṭha taka hna thawh a nih theihna atan puitu neih kan duh a ni. State dangah chuan intihlungawina atan minister aia tamte par­liamentary secretary ruat an ni ṭhin," a ti a; a kaihhruai sorkarin ṭha leh chak zawka hna a thawh theihna atan parlia­mentary secretary ruat an nih thu a sawi.

Chief Minister chuan, parliamentary secretary bànna thehluhah thangṭhat lak tum an tum thu sawiin, "Lawm taka din­hmun ropui tak aṭanga bàn hi thil har tak a ni mai thei; parliamentary secretary pasarihte hi chu hlim takin an bâng a, a ropui hle. Bànna an rawn thehluhin kan inkâwm a, an hlim hle a, an chhuah hnuah pawh an hlim hlein ka hria," a ti.

Assembly inthlan tura Chakma candidate neih chungchangah Lal Thanhawla chuan, "Chakma candidate hi nei lo mah ila, India khua leh tui an nih avangin an candidate ang a, MLA pahnih an nei dawn tho tho. An tling tho si ang a, lal siamtuah ṭangin, kan tilal ting lo ang tih a sawi theih loh," a ti a; Chakma candidate neih loh tih chu uluk taka ngaihtuah a ngai niin a sawi.

Chief Minister chuan, Excise & Narcotics department-in an ruihhlo man an tichingpen ṭhin tih a sawi chu a chian thu sawiin, "Hmanlaia thil thleng a ni. Excise department hotute'n an la ná a, thuthar thehdarhtute an hmachhawn a ni. Sorkar hnathawk hian sorkar thu loin thuthar thehdarhtute an hmachhawn thei lo. Chief Secretary-ah lehkha ka ziak a, phalna an lak leh lak loh ka zawtfiah a, engtin nge an tih dawn ka hre lo," a ti.