JNU Mizote'n PMO-ah memorandum an thehlut

Jawaharlal Nehru University (JNU)-a Mizo Students' Forum (MSF) chuan, Chakma-te Mizoram mi dik tak an nih leh nih loh chungchangah nimin khan Prime Minister Office (PMO)-ah memorandum an thehlut. Memorandum-ah hian Chakma buaina chungchanga thil hrang hrangte leh a chinfelna tura sorkar laipui tih turte an ziak.

JNU-MSF chuan, Mizote chu India rama an awm dan turah Indian Constitution Article 371-G hnuaia humhalh bik an ni tih sawiin, "Chu chuan kan hnam nun dan sakhua leh, hmanlai aṭanga kan lo chin ṭhan thil hrang hrangte humhalh bikna min pe a, mi tluklehdingawn chuang awmna India-ah hnam tlemtê, nuai 10 emaw âwrh niin, hnam lian leh chak zawkte'n an chîm ral mai lohna turin Constitution-ah invenhimna ‘special provision’ pek kan ni," an ti.

JNU-MSF chuan, tun hnaiah dan loa Mizoram lût hnam dangte nen buaina a awm ta zeuh zeuh tih sawiin, buaina chingfel tur chuan Central leh state sorkar ten mawhphurhna lian tak an nei ve ve thu an tarlang.

JNU-MSF-in Memorandum-a an ziah ṭhenkhat
1. Mizorama dan loa Chakma leh hnam dangte zalen taka an rawn lut ṭhin nia lang hi mumal taka khuahkhirhna a awm loh chuan kan buaina tam takin zual lam a pan zel dawn niin a lang. Chingfel turin state sorkarin tih tur a tih tawk loh vang te, Central sorkarin cross border illegal migration chingfel turin policy mumal a neih loh vang niin kan hria. A rang lama central leh state sorkarin a chinfel vat kan phût.
2. Mizoramah hian mi 10 zela pakhat ang deuh thaw Chakma population a ni a, census data leh record hrang hrang enin, rinhlelh rual lohin abnormal population growth a awm niin a lang a, chu chuan Mizo society leh demographic balance a tibuai niin a hriat.
3. India ramin Citizenship Act Amendment Bill 2016 hman a tumna hi nasa takin kan dodal a, a chhan chu - India rama minority-te dinhmun ngaihtuah lo lêkin sakhaw pakhat vuantu an nih chuan, dan loa pem lutte citizenship pek tumna a awm niin kan hria a, he dan hi Constitution Article 14 bawhchhiatna lian tak niin kan hria. Chuvangin, he bill hi min barh lui lo turin kan phût a ni.
4. Mizorama kan harsatnate chinfel a nih theihna turin NGO leh civil society hrang hrangin hmalakna leh hmachhawp an lo nei tawh
ṭhin a, mahse, sorkar chak loh vang leh political party-te vote bank politics vangin a hlawhtlinna kan hmu thei ṭhin lo. Pawl hrang hrang leh an hruaitute party politics dahṭha a, thu khat vuaa kan buaina chinfel dan tur zawng turin kan ngen a ni.
5. Mizoram chhung leh pawna Chakma mimal leh pawl hrang hrang te, Mizote nen a inhuatna chi tuh leh Mizote apawng apuia tih­hmingchhiat tum lo turin kan hriattir a ni.
6. Kan buainate chingfel tur hian mumal tak a dawhkan kilho a, buainain a nghawng zawng zawngte inbiakna sorkar, hmalaknaa neih hi thil ṭul pawimawh hmasa niin kan hria.
7. Mizoram hi India ramah pawh ziak leh chhiar thiam tamna, ṭhalai hnathawk rual leh thawk thei tamna hmun kan ni a, international border-a awm kan nih bawk avangin, India foreign policy leh a bikin, Asia chhimchhak ramte nena inlaichinna leh insumdawn tawnna kawng hrang hrang atan strategic location pawimawh tak a ni. Chuvang chuan, India ram tan pawh Mizorama hnam hrang hrang kara buaina awm hi a ṭha lo mai ni loin, India foreign policy tiṭhuanawp thei khawpa thil pawimawh a ni a, India sorkar hian a ngaihthah thiang lo.