Ruihhlo chungchanga zir chian tur thlirho

Social Welfare department chuan August 31, Ningani khan State Guest House conference hall-ah 'National Survey on Extent and Pattern of Substance Use in India' tih chung­changa inrâwnkhawmna an buatsaih a, Social Welfare secretary P Lal­chhuanga'n a hmanpui.

National Survey on Extent and Pattern of Substance Use in India hi sorkar laipuia Ministry of Social Justice and Empowerment kal­tlangin National Drug Dependence Treatment Centre (NDDTC) leh All India Institute of Medical Sciences (AIIMS), New Delhi ṭangkawpin an kalpui a ni a; India rama state tin leh union territory tinah survey neih tura ruahmanna a ni.

Survey-in a tum ber chu, India ram pum huap leh state chhunga damdawi hmangsual leh ruih theih thil ti awm zat chhiarna neih leh estimate siam te, India rama ruihhlo hmang sualte'n an nghei theihna tura hmalakna hrang hrang awm thei ngaihvente leh, ṭanpuina dawnna lama harsatna awm thei enfiah leh zirchian a ni.

Vantlang mipui mimir zingah ruihhlo an hmelhriat dan leh ruihhlo hnathawh an hriat dan zirchian nan Mizoram leh Tripura-ah mi 16,000 ve ve kawm an ni dawn. Zawhna zawttu (interviewer) hran a bika ruaiin, ruihhlo ti ṭhinte an kâwm dawn a, an dam­dawi khawih ṭhin leh an tih dante zawh chian a ni ang.

Survey hi India ram hmun hrang hranga agency thlan chhuahte'n an thawk dawn a, Mizoram leh Tripura-ah chuan Social Welfare department hnuaia Social Defence & Rehabilitation Board-in a kalpui ang.