Universal Drug Sensitivity Testing

National Health Mission (NHM), Mizoram mission director Dr Lalrozama chuan, nimin khan a pisaah, ngawr (TB) dona kawnga hmalakna thar, 'Universal Drug Sensitivity Testing' chu Mizoramah kalpui ṭan a nih dawn thu a puang.

Dr Lalrozama chuan, Universal Drug Sentivity Testing kalpui tak tak a nih hunah chuan TB vei tawh phawt chu MDR-TB an vei nge vei lo enfiah nghal zel a nih tur thu a sawi a, "Hei hian a tir aṭanga MDR-TB vei tih hriat lohte rang takin a hmuchhuak thuai ang a, a enkawlna kawngah damlo leh a enkawltute hun khawhral loin damdawi a hun takah pek an nih vat theih phah dawn a ni," a ti.

Universal Drug Sensitivity Testing hi TB vei hmuh chhuah zawng zawngte tana hman tura duan a ni. NHM Mission Director-in a tarlan danin, India ram hi khawvelah TB leh MDR-TB vei tamna ber a ni a; Mizoramah bikah kum 2016 chhung khan MDR-TB vei mi 47 hmuh chhuah niin, a tlangpuiin MDR-TB vei zinga enkawl dam zat chu 66% a ni.