Mamitah faina hnatlang huaihawt

Mizoram State Sanitation Task Force (MSTC)-in Mizoram khawpui fai a thlan tura inbuatsaihna a tan Mamit khawpuia village council parukte chuan nimin khan an huam chhung ṭheuhah vantlang hnatlangpui an huaihawt.

Mamit khawpui chhung veng hrang hrang - Hmarveng, Venghlun, Bazar Veng, Chhimveng, New Mamit leh Luangpawlahte faina hnatlang pualin inkhawm tawi buatsaih a ni a; sorkar department hrang hranga head of office-te'n telpuiin, faina kawnga ṭan la thar tura infuihna hun leh faina lam pan tura mahni inhlan tharna thutiam neih a ni.

Hmarveng YMA Hall-a inkhawm buatsaih hmanpuitu, Mamit DC Lalbiaksangi chuan, khawpui fai inelna hmachhawn turin mimal leh chhungkaw tinte ṭanrualnain rah ṭha tak a chhuah ngei a beisei thu a sawi a, "Keimahni, kan chhungkua faina turin tih theih kan nei a ni tih hre thar leh ṭheuh ila, faina kawng leh kawng dang­ah pawh sorkar tih tura bikah dah mai loin, thawh chhuah nachang kan hriat a ṭul," a ti.

Mamit khawpuiin faina kawnga hma a sawnna tur leh khawpui fai inelna hmachhawn tur hian DC kaihhruainaa ruahmanna siam tawh angin, chhung tin, sorkar department, kohhran, pawl hrang hrangte leh bazara inzuar ṭhinte tan a tahtawla hna­tlan hun siam a ni.