Pawikhawihna tuartute zangnadawmna pe

Law & Judicial minister Lalsawta chuan nimin khan Aijal Club-ah Aizawl district-a pawikhawihna leh suahsual tuar­tu mi 13 hnenah zangnadawmna a sem.

Pawikhawihna tuartute hnena zangnadawmna hi Mizoram State Legal Services Authority-in an pek a ni a, The Mizoram Victims of Crime Compensation (Amendment) Scheme 2016 hnuaia misual kut tuarte enkawlna leh chhawmdawlna atana Mizoram sorkarin a ruahman aṭanga pek niin, nimin bikah chuan Rs. 33,75,000 sem ral a ni.

Law & judicial Minister chuan, pawi khawihna tuartute hnena zangnadawmna pek a ngai ṭhin chu thil lungchhiatthlak a nih thu sawiin, engtikah emaw chuan sem ngai tawh lo tur khawpin khawtlangah sual­na nawr tawma a awm a duh thu a sawi.

Lalsawta chuan, suahsualna kut tawrh vanga taksa hmelhemna leh rilru thlabârnate chu awlsam taka ngai awh tura insiamsak theih a ni lo tih sawiin, "Hetiang thilah hian sorkar chuan kawng eng emaw tala rilru leh taksa enkawlna kawngah vanduai tâwkte a chhâwk zângkhai theih nan zangnadawmna hi a siam a ni," a ti. Misual leh sualna do turin sorkarin theih­tawp a chhuah zel tur thu a sawi bawk.

The Mizoram Victims of Crime Compensation (Amendment) Scheme 2016 hnuaia zangnadawmna pek zat hi vanduaina an tawh dan azirin hmuh theih zat bithliah a ni. Acid hmanga beihna, pawngsual, naupang chunga hleihlenna, zahmawh rawngkai inchhaihna, thihna, ramtuileiloa awm phah te, taksaa kâng tuarte leh nu pum chhunga naute thi leh nau pai theih loh phahte'n an dil thei. Ukil kaltlang khera dilna buaipui a ngai lo a, dilna chu District Legal Services Authority-te'n MHIP leh YMA-te nena an enho hnuah, State Legal Services Authority-ah thehluh ṭhin a ni.