KHAWTHLIR

Garage neih tur
Transport department chuan thupek chhuahin, Aizawl Municipal Corporation huam chhunga lirthei neitute'n November 30, 2017 ral hma ngeiin garage (mi ta luah a huam) nei vek turin a hriattir. Thupek hi July 27, 2016-a Coordination Committee on Traffic Management ṭhukhawmin a rawt anga siam a ni.

Cement endik
Serchhip Legal Metrology enforcement-te chuan, nimin khan Serchhip khawpuia cement zawrhte bûk a tlin leh tlin loh an endik a; bûk tling lo leh bûkna dik lo hmang hmuh chhuah an nei lo.

Heroin man
Excise & Narcotics department-a Anti-Narcotics Squad chuan August 31, Ningani zan khan Bawngkawn Chhimvengah heroin gram 75 (hawng 5) leh a neitua puh - Vanlalvena (30) s/o Lalrinawma, Bawngkawn (Lunglei Road) leh Lalbiakfeli (25) d/o Chawngnghinglova (L), Bawngkawn nia inchhálte an man. Anni hnen aṭang tho hian nimin chawhma dar 10 khan Lunglei road-ah heroin gram 204 (hawng 14) an man leh bawk.

Green Park hawng
Muallungthu rama Green Park siam chu nimin khan hawn a ni. Green Park hi Muallungthu-Khumtung kawng, Darkhuang rama awm a ni a, Green Mizoram Network (GMN) enkawl tura tih a ni. A chhungah ramngaw humhalh bikna hmun, swiming pool leh sangha dilte a awm.

V/C hming thlak
Mizoram sorkar chuan Saitual-II Village Council/Court chu a hming a thlak a, Saitual Venglai Village Council/Court tih a ni tawh ang. He hriattirna hi Local Administration Department chuan August 30, 2017 khan a tichhuak a ni.