Kut hnathawktute'n lei rem an rah hma chuan Zoram nuam a awm thei dawn lo - CM Hawla

Chief minister Lal Thanhawla chuan, Mizoram mipui zinga tam ber, kut hnathawktute'n lei rem an rah hma loh chuan Zoram nuam leh hmasawn a awm theih dawn lo tih a sawi.

Indian Council of Agricultural Research (ICAR)-National Research Centre on Mithun, Nagaland leh AH&VETY department-in September 2, Inrinnia 'Stakeholders workshop on Semi-Intensive Mithun Farming as Alternative Livehood' an buatsaih a hmanpuinaah thu sawiin Chief Minister chuan, "Sorkar hmalaknaah kut hnathawktute leh entrepreneur-te ngaih pawimawh ber an ni. Mizoram bikah, mi 60% chuang kut hnathawktute an ni tih hriat reng a ngai," a ti.

Lal Thanhawla chuan, Mizoram mipui zinga tam ber kut hnathawktu, pachhia, hmeithai leh mi harsate an hlim a, lei rem an rah hma loh chu Zoram nuam leh hmasawn a awm thei dawn lo tih sawiin, "Kut hnathawktute'n leirem an rahna tur leh an khawbu záwla thlamuang taka ei an hmuh theihna tura ṭan lak chu sorkar hna pawimawh ber a ni reng ang," a ti a; sorkar hnathawk leh ram hruaitute chu kut hnathawktu leh mi harsate ṭanpuia kaihruai tura awm an nih thu a sawi.

Se vulh chu ṭuan leh máng ata tawh Mizo pi leh pute nuna bet tlat, thil hlut zawng tehna, sakhuana leh puithuna thila ran leklam, kût nikhuaa mipui hrâina ran pawimawh tak a ni tih sawiin CM Hawla chuan, "A hlutna ngaihtuah chianna emaw, sumdawnna thila hman a nih theih dante tun thlengin se vulhtute rilruah lut lo mah se, tunlai thiamna hmanga vulh leh a ṭangkaina tam tak hriat chian a ni ta hi a lawmawm hle. Sakhaw chi tinrengte pawhin sa ei theiha an pawm tlan, sakhuanna pawisawi lo, secular meat a nih bakah, a hnute thlengin secular milk a ni," a ti.

Department of Agriculture Research & Education (DARE) secretary Dr Trilochan Mohapatra chuan, agriculture tihhmasawnna tura hma latu ICAR-in India hmarchhak bial chhunga mite'n agriculture, horticulture, fishery leh animal husbandry aṭanga intodelhna an hmuh theih nan theihtawp a chhuah zel dawn tih a sawi a, "In kawtkaiah lo kalin puih in ngaihnaahte theihtawp kan chhuah zel ang," a ti a; se vulhtute tihhmasawnna turin ICAR-in demonstration centre/unit pahnih kumin chhungin siam a tum thu a sawi.

Workshop-ah hian Aizawl, Siaha, Champhai, Serchhip leh Lawngtlai district-a se vulhtute an tel a; sial enkawl dan leh hlâwk zawka se vulh kalpui theih dante zirtir an ni.

Workshop-a tarlan danin, ICAR thiamna tlawlhchhanin Mizoram Mithun Production & Development Project kalpui a ni dawn a, phase-I kalpuina turin NEDP aṭangin Rs. 3,82,92,563 hmuh a ni tawh. Phase dang kalpuina tur leh sum hnár tur pawh chinfel thawkhat a ni tawh bawk.

MMPDP kalpuina tur hian ram ram hectare 20,000-a zau ruahman a ni tawh a; project chhungah ran inthlah punna leh vulh thauna hmun ranch panga siam, intensive mithun stud farm, seed center, off-farm infrastructure leh technical service-te khung tel a ni.

Livestock Census 2012-in a tarlan danin, Mizoramah sial 3,212 vulh mek a ni a, chu'ng zinga 1,858 chu Champhai dstrict khaw 26-ah vulh niin, Siaha district-a khaw 10-ah 1,219 leh a dang tlem azawng chu Aizawl leh Serchhip district-ahte vulh a ni.