Mizoramah hun tiama kawng siam zawh loh a tam

PWD Chief Engineer (Roads)-in RTI Act hmanga zawhna an chhan danin, Mizorama kawngpui siam hna, cheng nuai 100 aia tam senna 42 zingah, a thawktu contractor zingah hun tiama hna zo hman lo eng emaw zat an awm.

Hnate chu revise estimate leh re-revise estimate a awm lo vek thung. Hna 42 thawktu contractor zinga pali chu hnam dang an ni a, a bâk zawng chu Mizo an ni.

RTI Act hmanga zawhna chhannaah hian cheng nuai 100 aia tam senna kawng siam, hmun 42-a thawhte tarlan a ni a, hna thawh hun tiam chhunga zawh hman loh chhan pathum chiah an sawifiah.

Muallungthu-Khumtung kawng, km. 21.9-a thuia km. 11.60-33.50 chu agreement amount nuai 1728.30 a ni a, February 15, 2015 aṭanga October 5, 2016 chhunga thawh tur a ni. Permanent work zawh tawh niin, pavement thawh mek a ni a, kum 2016 fûr laia leiminin a hnawh ṭhin hnuah, January 2017-ah thawh chhunzawm leh a ni. Zawh hun tur sawn hlat niin, kumin December-ah zawh tura ruahman a ni a, contractor chu H Lalremvela, Venglai Aizawl a ni.

Zote-Chhipphir kawng, km. 9.48-a thui siam hna chu Vanlalsanga'n a thawk a, permanent work bik cheng nuai 315.63 man a ni. May 19, 2016 - May 19, 2017 chhunga thawh tura tih ni mahse zawh a la ni lo a, "Thla khat hnu velah zo tura beisei a ni," tia chhan a ni. Zote-Chhipphir kawng pavement work bik chu Lalrintluanga Punte-in thawkin, agreement amount chu nuai 702.14 a ni a, June 5, 2017 aṭanga December 5, 2019 chhunga thawh zawh tur a ni thung.

NEC suma thawh, Thanlon-Singhat Road (Ngopa-Tuivai), km. 43.40-a thui chu Tantia Constructions-in thawkin, agreement amount chu cheng nuai 3716.60 a ni a; June 4, 2015 - June 3, 2016 chhunga thawh zawh tur a nih laiin zawh a la ni lo a, "Thawh mek niin, December 2017-ah zo tura beisei an ni," an ti.

Kum 2018-19 chhunga thawh zawh tur pali a awm. Chuhvel-Sihthiang kawng, km. 11-a thui chu June 23, 2016-a thawh ṭan a ni a, June 23, 2018-a zawh tur a ni. Contractor V Malsawm­dawngliana, Chanmari, Aizawl-in a thawk a, agreement amount chu cheng nuai 777.06 a ni.

Hnahthial-Thingsai kawnga Tuichang-Tumtukawn inkar, km. 41.50-a thui chu cheng nuai 3244.55-a siam tur niin, SLT Infracon Pvt.Ltd., Badarpurghat-in an thawk a, September 18, 2016 leh June 18, 2019 inkar thawh zawh tur a ni. South Lungdai - Serte - Sertlangpui kawng, km. 27-a thui chu cheng nuai 2258.83 man niin, Sadguru Engineers & Allied Services-in an thawk a, May 12, 2017 aṭanga November 12, 2018 inkara thawh zawh tur a ni.

Khaw kar kawng siam dang 30 chuang chu hna thawh hun chhung bithliah tarlan ni mah se, hun tiama zawh hman a nih leh nih loh chhan sawifiahna a ni lo.

Hmunṭha leh Khawbel inkar kawng (CFC), km. 19.95-a thui chu February 21, 2103-a thawh ṭan tawh, December 21, 2105-a zawh tura tih a nih laiin, tun thlengin zawh a la ni lo a, agreement amount chu nuai 1,077 a ni. East Lungdar leh Sailulak inkar kawng, km. 18.58-a thui, cheng nuai 1236.06 man pawh December 21, 2013-a thawh ṭan, December 21, 2015-a zawh hman tur ni mah se, tun thlengin zawh a la ni lo tih an sawi.

Chhingchhip leh Hmunṭha inkar km. 24.40-a thui, cheng nuai 1,280.85 man pawh December 21, 2013 aṭanga December 21, 2015 inkara siam zawh tur a nih laiin, tun thlangin zawh a la ni lo a, zawh hman loh chhan tarlan a ni lo. Chhingchhip leh Hualtu kawng km. 20.25-a thui, cheng nuai 1259 man pawh 2015-a awh tur pawh tun thlengin zawh a la ni lo bawk.