Vaihlo kaihhnawih dan loa lut a tam

Mizoram State Tobacco Control Society chuan thuchhuah siamin, ram ṭhenawm, Myanmar leh Bangladesh aṭangin dan loa vaihlo aṭanga thil siam (tobacco product) rawn lut a tam hle niin an tarlang.

Ram dang aṭanga vaihlo aṭanga thil siam chi hrang hrang rawn lutte chu The Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003 (COTPA) Section 7-in a phût ang vaukhànna thu leh a lem (pictorial health warning) a awm lo tlangpui niin an sawi.

MSTCS tarlan danin, zirchianna aṭanga hmuh dan chuan, vaihlo báwma vaukhànna thu leh a lem tarlan chu ṭhalai leh nau­pangte'n vaihlo hman an hlauh phah bakah, a hmang mekte pawhin sim an duh phah thei ṭhin a, sorkar laipui pawhin a ngai pawimawh hle. Vaihlo ṭhat lohzia thu leh a lem (pictorial health warning) vaihlo báwma chuantir chu tun hma chuan vaihlo báwma 40%-a zau awh tura tih a ni a, tunah chuan 85% a awh tura tih a ni tawh. Dan zâwm lote chu pawisa chawitir leh lung-in tàntir theih an ni.

The Legal Metrology Act, 2009 leh The Legal Metrology (Packaged Commodities) Rules, 2011 dan angin, packaged commodity zawng zawngah manufacturer/packer/importer hming leh address kimchang ziah tur a ni a; bungraw hming (generic name - e.g. cigarette), a zat (e.g.10 or 20), manufacture/ pre-pack/ import ni leh thla, a man zat (maximum retail price), etc. a awm ngei tur a ni bawk.

MSTCS chuan Burma leh Bangladesh aṭanga dan loa vaihlo aṭanga siam chhuah (contraband cigarette) lak luhah COTPA leh Legal Metrology-in danin a phût angte tarlan a ni lo fo tih sawiin, "Heng contraband cigarette hmanga sumdawnna neite reng reng chu COTPA 2003 dan bakah, Legal Metrology dan hmanga pawisa chawitir bakah, lung-in táng turah remna pek theih an ni," an ti. Contraband cigarette-te'n chhiah an chawi ve loh avangin a ngaimawhawm zual tih an tarlang.

Vaihlo chungchanga dante hi chak leh khauh zawka kenkawh zel a nih tur thu MSTCS chuan an tarlang bawk.