Thil târ an tihchhiatte siam tha turin, Durtlang khawtlangin AMC an phût

Aizawl Municipal Corporation (AMC)-in AMC Display of Advertisement and Hoarding Regulation, 2013 tlawh chhana Aizawla phalna la loa tàr hoarding, banner leh poster-te an senghawi a; Durtlang khawtlang chuan an huam chhunga kohhran leh vantlang thuziak AMC-in a tihchhiatte chu September 2017 chhung ngeia siamṭha turin AMC an phût.

Hetihlai hian AMC Mayor PC Lalhming­thanga chuan AMC ho chet dan chu a hriatpui loh thu a sawi.

Durtlanga kohhran leh kohhran ṭhalaite thu târ tihchhiat a nih chungchangah Durtlang khawtlang an lungawi lo hle a; nimin chawhnu khan Durtlang, Leitan leh Durtlang North-a YMA hruaitute chu an ṭhukhawm a, hmalak dan tur an rel.

Durtlang Joint YMA chuan, an khaw chhunga thu pawimawh tak tak tàrte AMC hnathawkte'n an tihchhiatsak chu siamṭha leh vek turin an phût a, "September thla chhung ngeia min siamṭhatsak turin kan phût a, an siamṭha lo a nih chuan a ṭul anga hmalak zel a ni ang," an ti.

Durtlang Joint YMA chuan, inhriat­tir lawkna leh inhrilhfiahna awm hmasa loa kohhran leh pawl dangte'n sum tam tak senga thu an tàrte tih­chhiat a ni chu an hriatthiam loh thu leh an rilru a nat thu te, ṭha taka indawr hmasak tawh ni se an duh thu te, tun hnua chuan hmalak dawnah zir chian hmasak a, chiang taka mipui hrilh hmasak ni se an duh thu an tarlang.

Mimal hmun leh sorkar hmuna kawtthler leh hmun pawimawh inkawhhmuhna thu tár te, pisa leh zirna-in kawng inkawhhmuhna thu tarte chu AMC Display of Advertisement and Hoarding Regulation, 2013-in a huam lo niin an tarlang bawk.

AMC hian dan loa târ hoarding, banner leh poster-te senghawi hna hi August 28, 2017 aṭangin an thawk ṭan a, an la thawk mek zel.

AMC Ward-I (Durtlang, etc.)-ah chuan kohhran leh kohhran ṭhalai pawlte'n Pathian thu leh nun dan ṭha inkawhhmuhna thu an târ te, hmun leh kawng inkawhhmuhna thu tàrte pawh an tichhia a ni.

AMC mayor PC Lalhming­thanga chuan, dan loa hoarding, banner leh poster tàrte senghawi leh tihchhiat a nih chungchang hi a hriatpui lo tih a sawi a; AMC-ah Hoarding Sub-Committee an awm tih sawiin, anni pawhin thupek chu an hriatpui loh thu leh, a hriatpuinaa tih chu ni se tun ang rup rupa thil tih a nih a rin loh thu a sawi bawk.

AMC hotute chuan, dan loa tàrte chu senghawi zel tum a nih thu an sawi rual­in, Durtlang leh a chhehvela an tih dan aia ném deuh zawka tih tum a nih thu an sawi a; an tih tawh chinah mi rilru tihnat an nei a nih chuan mipui hriatthiam an dil.

Ward-I councillor R Zomuanpuii chuan, a bial chhunga hoarding, banner leh poster tihchhiat a nih chungchang chu a hriatpui lo nia sawiin, AMC hotute aṭang pawhin a bial chhungah hmalak tum a nih thu a dawn loh thu a sawi a; hmalak a nih dawnah zau zawka mipui hriattirna tihchhuah hmasak âwm nia a ngaih thu leh, sumdawnna kaihhnawih ni lo, kohhran, YMA leh tlawmngai pawl dangte thu târte chu tichhe loin, a tártute la thla tura hriattirna pek zawk ni se a ṭhat a rin thu a sawi.

Aizawla dan anga phalna la loa hoarding, banner leh poster tarte senghawi leh tih­chhiat a nih chungchangah hian AMC chuan September 1, 2017 khan legal notice an hmu nia thu dawn a ni bawk.

AMC-in August 28 aṭanga hoarding, banner leh poster tarte an endiknaah phalna nei loa tàr 185 a hmu tawh a, chung zinga 84 chu an senghawi tawh a ni.