Health Minister-in LRM Hospital a hawng

LRM Hospital, Ramhlun Venglaia mi chu September 1, 2017 tlai khan Health minister Lal Thanzara'n a hawng. LRM Hospital-ah hian department paruk awmin, khum 66 a awm.

Health Minister chuan, LRM Hospital hawn a ni chu lawmawm a tih thu sawiin, "Sorkar damdawi-inte'n mipui­te mamawhna a dâwl zawh tawh loh avangin mimal din damdawi-in thar a awm leh thei ta hi damlote leh ram tana malsawmna a ni. Mimal damdawi-inte'n sorkar ko an tihzângkhai mai piah lamah, sorkarin hna a pek sèn loh mi tam takte eizawnnna siamtu an ni hi rawngbawlna pawimawh tak a ni," a ti.

Damdawi-in chu sum­dawnnna ni loin, mi hnuaihnung zawk leh chhumchhiate tana rawng­bawlna remchang tak a nih thu sawiin Lal Thanzara chuan, ṭha­hnemngai taka damlote hmangaihna leh lainatna nen an mangannnate phurhpui mai duhtâwk lo a, phurhsak zawk ṭhin turin thawktute a chah.

Health Minister chuan, phai lam aṭanga dactor thiam chah chhuah ṭhin chu phai lam panna nei lote tan a ṭhat thu a sawi rualin, "Damlote hmakhua ngaih aia sum siamna lama kal nat zawkte a awm theih avangin, mithiam chah chhuah kawngah Health department thuneitute hriattir hmasak ṭhin ni thei se a ṭha," a ti.

Damdawi-in hawnna inkhawm hi paediatrician Dr K Lalawmpuia'n a kaihruai a, director V Lalduhawma'n technical report a pe.

LRM Hospital-ah hian thawktu 108 an awm a, department hrang hrang paruk - medicine, surgery, obstetrics and gynaecology, maternity and paediatrics leh dental-te a awm. Khum 66 a awm a; chungte chu - general-ah khum 30, semi cabin-ah khum 4, cabin-ah khum 12, ICU-ah khum 5, NICU-ah khum 8, mother-ah khum 4 leh emergency-ah khum 3 a ni.