Lunglei YMA hruaitute'n Tlabung an tlawh

YMA sub-headquarters, Lunglei hruaitute chuan September 1, 2017 khan Tlabung leh a chhahvel khuate an tlawh a; kumina Khawthlangtuipui lianin chhiat­na a thlen dan an enfiah bakah, dan loa Bangladesh aṭanga Mizorama Chakma pêm luh dan an ngaihven.

Lunglei sub-hqrs. hruaitute hi an president R Lalnunthara hoin mi paruk an kal a, Tlabung Branch YMA hruaitute'n lo dawngsawngin, September 1 tlaiah India leh Bangladesh inrìna Kawrpuichhuah leh Bangladesh ram chin Threka Bazar an va tlawh.

Zanah Tlabung YMA Rûnah Tlabung branch, Zodin branch leh Chawnpui branch hruaitute nen an inkâwm a; ramri humhalh chungchang te, dan loa Mizoram thing leh maute ram páwna tawlh ṭhin chungchang te, electoral roll ennawn dan te, dan loa Mizorama lut ram dang miin birth certificate leh Aadhaar card an neih lohna tura hmalak dan turte an sawiho.

Lunglei sub-hqrs. YMA hruaitute chuan Tlabung leh a chhehvela YMA member leh Mizote chu ram leh hnam humhalhna turin hmun danga mite aiin an pawimawh zual tih sawiin, theih­tawpa ṭan la zel turin an fuih. Tlabung YMA hruaitute pawhin an lawmna leh harsatna hrang hrang an tawhte leh thuràwn an neihte an hrilh a ni.