Bairabi kawng siam thuai turin sorkar ngen

MNF ṭhalai chuan thuchhuah siamin, an hruaitute'n August 30, 2017 khan Mizorama buhfai lak luhna ber Rengtekawn leh Bai-rabi inkar kawngpui an enfiah tih an tarlang a; kawng chu a chhe hle nia sawiin, Mizoram Truck Owner Association-in September 10, 2017 hmaa siam tura sorkar an ngenna chu tihhlawhtling turin sorkar an ngen.

MNYF tarlan danin, Meidum leh Bairabi inkar kawng, km. 10 vela thui siam nan Ministry of Road Transports-in kum 2016-ah cheng nuai 2200 chuang a rawn pe a, kawng siam turin Sunshine Overseas thlan a ni. Contractor hnathawh chu a chhe hle a, chutih laiin, hna an zawh hmain estimate ennawn (revise) a ni tawh. Bairabi khaw chhung kawng, kumin tìr lama blacktop zawh pawh thla thum hnuah a khawk leh vek a ni.

MNYF chuan, MTOA-te’n kawng an zawh ngam tawh lo hi âwm kan tihpui hle a, "Truck owner leh driver-te hian an sum sêngin ṭum hnih a siam tawh a, cheng nuai 6 chuang an seng tawh. Tun hmaa Mizoram châkkhai phur tura wagon lo thleng tur chânga truck 80 awm ṭhin kha kawng chhiat vangin tunah hian wagon châng truck 11 chiah an awm tawh a ni," an ti.

Bairabi kawng chu a tluanin motor tlu leh chhia hmuh tur a tam hle tih sawiin MNYF chuan, truck neitute leh khalhtute chuan motor a tlûk loh nan leh an tlân theih ṭâwk ṭâwkna tur tala siam-

ṭhatsak turin Mizoram sorkar an beisei thu an sawi tih an tarlang.

MNYF chuan, Congress sorkarin Mizorama kawngpui pawimawhte a siamṭha thei lo chu vanduaithlak an tih thu sawiin, "Chief Minister-te unau induhsakna vanga thil thleng­ah kan ngai. Kawng a chhiat vanga thingtlang khaw tam takin kum khat chuang an MLA hmel an hmuh tawh loh laia ‘India hmarchhakah kawngpui kan nei ṭha ber’ min la tih khum hi mipui hmuhsitnaah kan ngai," an ti. Bairabi kawng chu MTOA ngenna angin, September 10 hma ngeia siam turin sorkar an ngen a ni.