KHAWTHLIR

Thisen pe
KṬP, Mission Veng Bial chuan diamond jubilee lawm nan, Inrinni khan Tuikhuahtlang Kohhran Hall-ah blood donation camp an huaihawt a, Synod Hospital tan mipa 61 leh hmeichhia 10-te'n thisen unit 71 an pe. Mission Veng Bial KṬP hian September 14-ah diamond jubilee lawmna pui ber an hmang ang. YLA, Niawhtlang branch pawhin Inrinni khan Siaha District Hospital tan thisen unit 29 an pe bawk a, a petute mipa 18 leh hmeichhia 11 an ni.

Lawmpuina hlan
State Bank of India (SBI), Mission Veng Branch chuan August 29, 2017-a SBI Mission Veng Branch ATM aṭanga Rs. 20,73,500 rukbo a nih hnua Kulikawn Police Station lamin an chhui chhuahsak vanga an lawmzia lantir nan September 1, Zirtawpni khan police-te hnenah lawmpuina an hlan. Lawmpuina hi SBI Mission Veng chief manager Sheryl Vanchhawng-in Aizawl South SDPO Lalbiakzauva hnenah a hlan a; DIG Joseph Lalchhuana leh Aizawl SP Neihchung-nunga ten an telpui a ni.

Flories Fair
Mizoram Florist Association chuan September 5-8, 2017 chhung hian Assembly Annexe chhawng hnuaiah Flories Fair an buatsaih dawn. Fair-ah hian pangpar ṭiak, a puitling sa, pot leh polypot-a phun nun sa te, plastic pot leh leiṭhate zawrh a ni ang.

Kawng hawng
Sikulpuikawn aṭanga Mission Veng Kawltheihuan pêng pawhtu Theipalingkawh kawng chu thawm ṭhat a nih hnuah Inrinni khan bialtu MLA Lt.Col. ZS Zuala'n a hawng. Kawng siam nan hian PWD aṭangin Rs. 71,000, UDPA aṭangin Rs. 3,00,000 leh MLA fund Rs. 3,00,000 an hmu a, kawng kama in neitute'n bungrua leh hmanruate an thawh bawk. He kawngah hian chho zawnga tlân phal a ni lo.

Jubilee lawm
The Salvation Army, Diakkawn Corps chuan Inrinni zan aṭang khan kum 50 (golden jubilee) tlin an lawm ṭan a, Pathian hnena lawmthu sawina inkhawm neiin, Western Division-a divisional commander Lt. Col. Samu Meitei, Divisional Commander, chuan jubilee mei a det. Nimin khan golden jubilee hawnna inkhawm hman niin, Diakkawn Corps a din theihna atana sulsutu mi pangate thlan-ah zahna pangpar dah a ni.