Covid-19 vei mi 9 hmuh belh Niminah dam tawh 5 chhuahtir

July 22, Nilaini khan Mizoram hmun pathumah swab sample 398 chuang endik a ni a, Covid-19 hripui vei mi pakua hmuh chhuah belh a ni. Nimin khan hripui vei dam tawh mi pali chu Lungleia Covid Care Centre (CCC) aṭangin chhuahtir an ni thung.

Sorkar thuchhuah tawhte aṭanga a lan danin, Mizorama hripui kai tawh zawng zawng chu mi 326 an ni a, chu'ng zinga mi 191 (58.59%) chuan vei tawh loin, vei mek mi 135 (41.41%) an awm a; negative tawh zinga mi 183 (vei tawh zat aṭangin 56.13%) chu chhuahtir an ni tawh. Chhuahtir tawhte hi civil mi 168 leh sipai 15 an ni.

Zoram Medical College (ZMC) laboratory-ah July 22 khan mi 365-te sample endik a ni a, hripui lakah mi 357 fi­hlimin, mi pariat - mipa paruk leh hmeichhia pahnihin an vei tih hmuh a ni.Sorkar thuchhuah tarlan danin, mi pariatte hi puitling pasarih, kum 26-51 inkar an ni a, mipa naupang kum 10 mi a tel. Mi paruk chu hnam dang an ni a, Mizo pahnih an tel a; Mizo pakhat zawk chu Assam Regiment sipai, tun hnaia Jammu & Kashmir aṭanga lo haw a ni. ZMC laboratory-a hripui vei hmuh tharte hi Aizawl district-a mi pasarih leh Kolasib district-a mi pakhat an ni a; Jammu & Kashmir, Assam, Bihar, West Bengal leh Nepal aṭanga tun hnaia Mizorama lo lutte niin, quarantine facility-a awm lai an ni. An zingah hian Zokhawsang, Aizawla Assam Rifles sipai pakhat a tel.

July 22-a ZMC laboratory-a endikte hi mipa 231 leh hmei­chhia 134 an ni a, an zingah hian ZMC-a thawk mi 101 (mipa 35, hmeichhia 66) an tel a ni. Nilaini vêk khan Champhai District Hospital-ah Rapid Antigen Test hmangin Covid-19 vei mi pakhat, mipa kum 28 mi hmuh chhuah a ni a, Assam Regiment sipai, tun hnaia rawn haw a ni. Quarantine facility-a awm lai a ni a, hripui a vei tih hmuh a nih hnuah Dedicated Covid Health Centre (DCHC)-ah dah nghal a ni. Sorkar thuchhuah chuan, Indian Council of Medical Research (ICMR) advisory angin, Rapid Antigen Test hmanga endiknaa Covid-19  positive chu a dik (true positive) ngeia ngaih a ni a, RT-PCR hmanga finfiah turin ZMC-ah sample thawn a ngai lo tih a tarlang.

Covid-19 vei hmuh chhuah tawh 326 zinga 205 chu civil mi an ni a, mi 121 chu sipai mi leh sa an ni thung. A vei mek, la negative lo mi 135 zinga mi 37 chu civil mi an ni a, 98 chu sipai an ni.

Sipai zinga Covid-19 vei hmuh chhuah tawh dan chu - Aizawl district-ah 100 (NDRF - 32, AR - 50, BSF - 16, Assam Regiment (Mizo) - 2); Lunglei district-ah BSF mi 18, Ser­chhip district-ah BSF mi pahnih leh Champhai district-ah Assam Regiment (Mizo) pakhat a ni.