Kum 2020-a ṭhiah New Market main building sak ṭhatna tur atan tender chhuah a la ni lo

Aizawl New Market main building ṭhiahna hmuna Smart City Projects sum hmanga building sak ṭhat nan cheng nuai 4,159 ruahman a ni a, building thar sa turin tender chhuah a la ni lo.

Vanglaini in RTI hmanga a zawhna Urban Development & Poverty Alleviation (UDPA) department SPIO-in September 1, 2022-a a chhan danin, Aizawl New Market main building sak ṭhat nan cheng nuai 4,159 ruahman a ni a; building thar sak nan tender chhuah a la ni lo a, tender tura hmalak mek a ni.

Bazar building sakṭhat nan hian Aizawl Smart City Ltd. chuan Ministry of Housing and Urban Affairs hnuaia Smart City Mission aṭangin pawisa a hmu a, building thar sak hna hi thawh a la nih loh avangin thawh zawh hun tur hriat a ni lo.

UDPA SPIO chuan building thar sakna tur atana pawisa dawn tawh zat zawhna chu, 'Smart City project pumpui atan hian cheng vbc. 196 (central share) leh cheng vbc. 13.67 (state share), a zavaiin cheng vbc. 209.67 dawn a ni tawh. Pawisa dawn hnuhnun ber chu ni 22.02.2022 a ni,' a ti.

Aizawl New Market main building hi July 2020 khan ṭhiah ṭan a ni a, building hluiah khan sumdawngte ṭhutna seat/ stall 11,03 a awm a; building thar sak turah hian seat 1,105 siam a ni dawn.

Hetihlai hian, Commerce & Industries department chuan tunhmaa Foreign Lane building ṭhinah Aizawl City Centre Annexe building sak hna an thawk mek. Building hi October, 2021-a thawh zawh tura tih ni mah se, sak zawh a la ni lo. September, 2022 tir lam thleng khan physical achievement 32% leh financial achievement 28.8% a ni.