Sorkar langtlang leh dik a awm theihna atan RTI hmangtu an tam zel ka beisei - Larsap

Governor Hari Babu Kambhampati leh chief information commissioner (CIC) Lalnunmawia Chuaungo-te chu nimin khan Raj Bhavan-ah an inkawm. Governor chuan sorkar langtlang leh dik a awm theih nan Right to Information (RTI) hmangtu Mizoramah an tam chhoh zel a beisei thu a sawi.

Governor chuan, CIC leh a thawhpuite chu hna an thawk ṭha nia a hriat thu a sawi a, "DAA, SPIO leh SAPIO-te nena inthlunna nghet zawk leh inbiakpawhna ṭha zawk in neih theih dan tur kawng dap zel ang che u. Sorkar langtlang leh dik a awm theih nan RTI hmangtu Mizoramah an tam chhoh zel ka beisei," a ti.

Lalnunmawia Chuaungo chuan Mizo­­­ram Information Commi­­ssion (MIC) in Section 4 of RTI Act-a in ziak anga 'Suo Motu Disclosure' ti hlawhtling tura sorkar department-te an hriattir chuan zawm a hlawh thawkhat tih a sawi.

CIC chuan, "Department tlem azáwngin tun thlengin an la tih loh avangin an hotute insawifiah turin kan ko mek," a ti a, RTI hmanga zawhna zawttu an tlem ṭhin chu siamṭhat tumin RTI Online siam a nih thu leh RTI ṭangkaina phawk chhuak turin zawhnate pawh a awm belh chho zel tura an ngaih thu a sawi.

Suo Moto Disclosure hi department hmalakna hrang hrang leh mipuiin an hriat turte RTI hmanga dil kher ngai loa department website-a lo dah lawk leh a ṭul anga update a ni.

CIC in RTI Week hawnna October 6, 2022-a neih huna hmanpui tura a sawmna chu Governor hian a pawm nghal a ni. CIC hi MIC secretary H Dolianbuaia leh deputy secretary Lily-te'n an ṭawiawm.