MNF-in Martarte Ni an hmang
Mizo National Front (MNF) chuan nimin khan Hnam Runah Martarte Ni vawi 43-na an hmang a, thusawitu MNF sr. vice president Tawnluia chuan martarte chu party ta ni lo, Mizo hnam martarte an nih thu a sawi.
MNF Sr. Vice President chuan martarte thlanmual tur ngaihtuahtu committee pawh NGO leh kohhrante telna a nih thu sawiin, "Martarte thlanmual enkawl hna pawh Art & Culture deptt kutah a awm tawh. Mizo hnam tana nun hlantute hmun hrang hrangah phum ni mah se, a theih chin chinah martar thlanmualah sawn an ni," a ti.
MNF-in independent a puan rualin hnam sipaite an chhuak tih sawiin Tawnluia chuan, "Remna a awm hnuah Mizoram chu special provision neiin, India, Mizoram leh MNF aiawhin hming sign a ni. Interim sorkar lo awm tur pawh kha thutlukna awmsa vek a ni," a ti a, zalenna sual chu kohhran, zirlai leh NGO-te ngenna angin tihtawp a nih thu a sawi.
Tawnluia chuan martarte chu Mizo hnam dinchhuahna tura nun hlantute an nih thu sawiin, "Mizo hnam hi tuma tihbuai loh leh mahnia ro inrel a nih theih nan nun hlan an ni. Kan hnam meichher chhitute leh Mizo nationalism kengtute an ni a. Kan hnam martarte hi harsatna tinreng paltlanga nunna hial hlantute an ni a, kan chawimawi tur a ni a, anmahni zahna chibai kan bûk tur a ni," a ti.