Mizoramin hydel project 14 a nei Power Mw. 34.55 an siam thei

Tun dinhmunah Mizoram chhungah hydel project leh small hydel project 15 a awm a, heng zinga 14 hi Mizoram ta niin, a lian ber Tuirial Hydel Project erawh NEEPCO ta a ni thung. Mizoram hydel project 14-te power siam chhuah theih belhkhawm chu megawatt 34.55 a ni.

Mizoram sorkarin hydel project a siam zinga lian ber chu Serlui B niin megawatt 12 siam chhuak thei a ni a, Tuiching leh Tuiriza chuan megawatt 0.10 ve ve chauh an siam chhuak thei thung. Hetihlai hian, Mizoram sorkar siam small hydel project ṭhenkhat chu hlui hlawn an ni tawh.

Small hydel project ṭhenkhat hluihlawn an nih chhan zawhna chhangin Power & Elec­tricty department chuan, "Kum tam tak liamta-a siam an nih tawh avangin khawl chi hrang hrang siamṭhat harsa leh siamṭhat tlak tawh lohte an ni," an ti.

Power & Electricity dept. chuan small hydel project ṭhenkhat chu tuilian leh leiminin nasa taka a tihchhiat avanga hluihlawn an nih thu sawiin,"Heng hluihlawn takte hi siamṭhat leh dawn chuan sum tam tak sen a ngai a ni," an ti a, sum sen tur leh power pek chhuah theih tur hlutna nen khaikhinin hlawk tawh lo zawk tura ngaih a nih thu an sawi.