L Thangmawia'n CSB hotute hnenah A bika Mizoram lam hawi turin a ngen

Human Resource Development Board vice chairman L Thangmawia, MLA chuan nimin khan Bangalore-a Central Silk Board (CSB) office-a tlawh a; Mizoram sorkarin rawtna a thlente bakah, hmalakna thar dang nei turin abik taka Mizoram lam hawi turin a ngen.

L Thangmawia chuan CSB hotute hnenah hian Mizoram tana an hmalak tawhna hrang hrangah lawmthu hrilhin, "Tuna CSB office-a inchiah mek Mulberry Sericulture Project atana cheng vbc 10.67 leh Mega Project on Eri Culture chhungkaw 3,000 tana project thehluhte hi a rang lama min pawmsak turin ka ngen che u a ni," a ti.

Mizoram hmun hrang hranga kuthnathawktu eng emaw zatte'n hlawhtling takin pangang chi hrang pali khawi hna an kalpui thu sawiin L Thangmawia chuan, "Ka bial chhung Pawlrang, Hliappui, Ngopa leh Chiahpui khuaa chhungkaw 40 chuangin Mulberry pangang khawi an kalpui mek a ni," a ti a, Muga pangang khawi phei chu sik leh sa inthlak avangin hmarchhak state danga harsatna an tawh avangin Mizoram chauha kalpui tura ruahmanna siam a ṭul thu a sawi.

Sericulture tharchhuah cocoon-te chu kawngpui (link road) awm lohnaah mi pakhat in Rs 7,000 man hu a phurh chhuah theih laiin, tharchhuah dangte chu motor-a phurh an nih loh chuan mi pakhat in Rs 1,000 man pawh an phurh zawh loh thu leh Mizoram sorkar rawtnate CSB-in a tihlawhtling thei a nih chuan Mizote mil eizawnna hlawhtling taka kalpui theih, India ram tan pawh chhenfakawm khawp hlawhtlinna Mizoramah a thleng thei niin a sawi bawk.

CSB member secretary Rajit Ranjan Okhandier chuan,"Mizoram hi silk pangang khawi nana duhthusam climate nei a nih avangin kan theihna apianga pui turin kan inpeih," a ti a, state sorkarin a ṭul anga a bawhzui apiangah theihtawp an lo chhuahpui tur thu a lo hrilh niin sorkar thuchhuah in a tarlang.

Central Silk Board hi India Parliament-in kum 1948-a a din a ni a, Bangalore-ah hmunpui neiin Ministry of Textiles hnuaia awm a ni.