Kolasib leh Serchhipah Martarte Ni hman a ni

Nimin khan Kolasib leh Sechhipah Martarte Ni hman a ni a, Kolasibah chuan Kolasib Block MNF huaihawtin IPR conference hall-ah MNF vice president Vanlalzawma hoa hman a ni.

Vanlalzawma chuan ram leh hnam tana martarte chu eng hnam mahin an hmusit ngai lo tih sawiin, "Khawvel hnam zawng zawng hian an ram tana martarte an ngaihlu a, an zahin an chawimawi ṭhin a ni. MNF hian danglamna bik kan nei a, Zoram tana nunna hlantu leh nunna thapa rammute kan ni. Tunah hian kan CM pawh Zoram mamawh buaipuiin a thang mek a, ram tana martar ngam party hruaitu hi an ngaihlu a, central lam hotute pawh awlsam takin an hmuh zung zung theih phah a ni," a ti.

Hamṭhatna beiseia party hrang hranga lut kual ṭhinte chuan, an duh leh beisei ang an hmuh lohin vuivaina an zawng reng tih sawiin, "MNF party chu therhlo beisei vanga awm khawm kan ni lo. Martar te thisen aṭanga lo ding chho a, kum 60 zet Pathianin a lo kaihhruai tawh party kan ni. Chutiang avang chuan Pathianin hun harsa hmachhawn tur chauhin min sorkar tir a rinawm loh," a ti a, MNF kutah Pathianin ram damna tur thil tamtak a dah ngei a rin thu a sawi.

Martarte Ni hi Sechhipah chuan MNF East Block Serchhip buatsaihin New Serchhip YMA Hall-ah hman a ni a, an hun hmanpuitu MNF adviser Lalruatkima chuan Mizote'n engtik niah emaw zalenna famkim an neih tur thu sawiin, "Pathianin hun ṭha min la pe ang tih hi kan pawm dan a ni," a ti.

Lalruatkima chuan hnam pasalṭhate inpekna leh an hlutna, chawimawia chawi- san an ṭul zia thinlungah a thar a duh thu sawiin, "Ṭhangthar lo awm zel turte pawhin martarte inpekna hlut zia hi i hre thar ang u. He ram tan hian e'nge kan tih ve theih, tih mahni inzawt ila, martarte thisenah inhlan thar ang u. Kum 1966-ah hnam pasalṭhate'n zalenna famkim nei turin zalenna an sual a ni," a ti a, mi tam takin ram leh hnam tan an nunna hlu tak an hlan thu a sawi.