Kolasiba bank-te'n hmun khata Awareness camp huaihawt an rel

Kolasib District Level Review Committee chu an chairman John LT Sanga, bawrhsap kaihhruaiin nimin khan DC conferenc hall-ah an ṭhukhawm a, hmalakna hrang hrang an thlirlet. Kolasiba bank hrang hrangte'n hmun khatah mipui vantlang tan awareness camp huaihawt an rêl a ni.

April-June, 2022 chhung khan Kolasib district-a bank-te'n sum an dawn aṭanga loan an pekchhuah zat khaikhinna credit deposit ratio (CD Ratio) chu 69.11% a ni a, CD Ratio ṭha ni tura a hniam lam bituk zat 60% an khûm a ni.

John LT Sanga chuan bank chu ram hmasawnna tura hmanraw ṭangkai tak a nih thu leh ni tin mipui dawrtu ṭhahnem tak awmna hmun a nih angin thawktute taimakna leh inpekna a pawimawh thu a sawi a; sorkar ruahmanna hnuaia bank kaltlanga mipui hamṭhatna tur hrang hrangte zau zawka inhrilhfiah leh hamṭhatnate chu a taka mipuiin an chhawr ngei theih nan bank hotute chu hmalakpui turin a sawm.

LEED Bank manager Lalengmawii pawhin thu sawiin, hmasawnna hna thawhna tura bank aṭanga pawisa inpuktir kawngah mi rintlakte chauh thlanchhuah an nih theih nan sorkar department-te nen thawhhona ṭha neih a ṭul thu sawi.

Ṭhukhawm chuan Kolasiba bank hrang hrangte'n hmun khatah mipui vantlang tan awareness camp huaihawt an rêl a; Kolasib district-a mi 2,000 aia tlem chenna khaw 29 zinga 23-ah Business Correspondent dah an nih tawh thu te, June 2022 thleng khan PMJDY hnuaiaah mi 19,322, PMJJBY hnuaiah mi 15,848, PMSBY hnuaiah mi 26,917 leh APY hnuaiah mi 1,209 an inziahluh tawh thute leh, Annual Credit Plan hnuaia hmachhawp zinga 19.12% chu kalpui a nih tawh thute tarlan a ni bawk.