KHAWTHLIR

CM leh mi pawimawhte inkawm
Chief minister Zoramthanga chuan September 19, Thawhṭanni khan Brazil Chamber of Commerce (IBCC) huaihawtin New Delhi Mizoram House-ah Brazil rama company lian hotute a kawm a, Mizorama hmasawnna ruhrel dinna leh hriselna kawnga thawhho dan tur an sawiho. Chief Minister hian adviser to prime minister Tarun Kumar leh principal secretary to prime minister PK Mishra-te pawh an pisaah ve ve a kawm a, Prime Minister hnena thu a lo thlen tawh bawhzuiin Mizoram mamawh a sawipui nghal. Manohar Parrikar Institute for Defence Studies and Analyses (MP-IDSA) in a sawm angin nimin khan Chief Minister hian an hotute a kawm a, Mizoram political history leh mimal chanchinte a sawipui. CM hi State Planning Board vice chairman H Rammawi-in a ṭawiawm.

Thisen pe
MNF, Khawzawl Block ṭhalaite chuan nimin khan Khawzawl Hospital-ah thisen pek an huaihawt a, Civil Hospital, Aizawl tan thisen unit 89 an pe a, petute mipa 78 leh hmeichhia 11 an ni. Hrangbana College NSS pawhin Civil Hospital, Aizawl tan thisen unit 47 an pe bawk a, petute mipa 44 leh hmeichhia pathum an ni.

Pre-Recruitment Training buatsaih
Champhai Police leh Serchhip Police-te chuan nimin khan October 4-9, 2022 inkara Rajiv Gandhi Stadium, Aizawla Army Recruitment Rally (Agnipath Scheme) neih tura inziaklut tawhte tan Pre-Recruitment Training/Coaching session an buatsaih ṭan a; Champhaiah mi 140 leh Serchhipah mi 18 an inziaklut tawh. Coaching hi district zawng zawngah neih tur a ni.

Lehkhabu tlangzarh
Professor Malsawmliana lehkhabu ziah 'Ni leh thla kara lêng' tih chu nimin khan Central YMA Hall-ah chief information commissioner Lalnunmawia Chuaungo, IAS (Rtd.) in a tlangzarh. Lehkhabu hi phek 183-a chhah niin, ṭhen 28 a awm.

Minister in tlawh
Rural Development minister Lalruatkima chuan nimin khan Serchhip Khawtetlanga cheng nuai 95 senga sak mek District Panchayati Bhavan a tlawh. Minister chuan a sak hna chu a ṭhat hmel hle nia a hriat thu sawiin, a rang lama hawn tum a nih thu a sawi.