Covid-19 positive 72 hmu chhuak

September 19, Thawhṭanni khan Mizoramah Covid-19 vei mi 72 hmuh chhuah a ni a, nimin khan hripui vei dam tawh mi 51 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 205 an awm.

Thawhṭannia hripui vei hmuh thar mi 72-te chu mipa 35 leh hmeichhia 37 niin, RAT hmanga hmuh 71 leh TrueNAT hmanga hmuh chhuah pakhat an ni a, swab sample 564 endik aṭangin positive zat chu 12.77% a ni.

Nimin khan hripui vei dam tawh mi 51 an chhuak a; district tina chhuak zat chu - Aizawlah 16, Lungleiah pakua, Khawzawlah pariat, Saitualah paruk, Serchhipah panga, Champhai, Lawngtlai leh Mamitah pahnih ṭheuh leh Siahaah pakhat an ni.

IDSP record angin, Mizoramah Covid-19 vei 2,38,123 hmuh chhuah a ni tawh a, mipa 1,10,918 leh hmeichhia 1,27,205 an ni a, mipa aiin hmeichhia 16,287-in an tam zawk. Nimin tlai dar 5 thleng khan mi 2,37,196 (99.61%) chhuahtir an ni tawh a, mi 722 (0.30%) thi tawhin, enkawl mek mi 205 (0.09%) an awm.

Kum 2011 chhiarpui angin, Covid-19 vei hmuh tawh 2,37,846 chu state mipui zat aṭangin 21.82% a tling a, India rama state zingah a sang ber. Mi 1,000 zelah positive 217 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.