CBI ko lut tura ngenna bawhzuiin MNF mite CMO-ah an kal khawm

MNF party hruaitute chu lottery chung­changa Central Bureau of Investigation (CBI) ko lut tura ngenna lehkha, Chief Minister hnena an thehluh tawh chanchin ngaihvenin nimin khan Chief Minister Office (CMO)-ah an kal nawn.

MNF hian lottery chungchang CBI chhui­tir a nih theih nan CBI ko lut turin CM Lal Thanhawla hnenah July 11, 2017 khan an general secretary C Lalrammawia hmingin lehkha an thehlut a; bawhzuina a awm loa an hriat avangin September 1 khan MNF-te chu Chief Secretary-ah kalin, sorkar hmalak zui dan an ngaihven a ni.

Chief Secretary an hmuhnaah hian CS Lalmalsawma chuan, 'Chief Minister aṭangin engmah hriattirna ka la dawng lo,' tiin a lo chhang tih sawiin, chuvang chuan September 1 tlaiah CM hmu turin an kal leh a; mahse, CM-in 'Ka hmu thei lo ang,' a lo tih avangin MNF-te chu hlawhchhamin an haw a ni.

Hmalakna thawm an hriat zui loh zel avangin MNF-te chu nimin khan MLA Dr K Beichhua leh party general secretary C Lalrammawia te hoin nimin khan CMO-ah an kal leh a, mi 70 chuang an tel. Nimina an ngaihvennaah hian Chief Minister chuan ziakin, ‘Lottery chungchangah pawh Chief Secretary CBI ko lut turin ka hrilh vat a’ tiin a lo chháng niin an sawi.

MNF chuan, September 1-a Chief Secretary an hmuhnaah CS Lalmalsawma'n CM aṭanga hriattirna a la dawn loh thu a sawi leh CM-in CBI ko lut tura Chief Secretary a hrilh vat thu nimina a sawi chu inkalh tlat niin an tarlang a, "A khawi hi nge dik zawk tih hi sawifiah vat turin MNF chuan Chief Minister kan phût a; Congress Bhavan-a inhrosa a, CBI ko lut tura insawi fo ringawt loin, a tak ngeiin hma la se, CBI hi ko lut vat turin kan phût tlat a ni," an ti.