Healthy Campaign chungchang sawiho
Nimin khan Raj Bhavan-ah Healthy Mizoram Campaign leh Project HIMNA-MADAT chungchang sawihona buatsaih a ni a, governor Lt. Gen. Nirbhay Sharma leh chief minister Lal Thanhawla'n a hmanpui.
Larsap chuan Mizoram chuan theihna leh thiamna nasa tak nei chunga hriselna lam kawnga harsatna a tawk fo chu a ngaimawh thu sawiin, "Khawtlang siamṭhatna turin kohhran, NGO, sorkar leh pawl hrang hrangte rim taka an thawk chung pawha ruihhlo a hluar zel hi a veiawm hle. Hemi tireha nuaibo tur chuan kan zavaia inthuruala thawhho a ngai a ni," a ti.
Chief Minister pawhin thu sawiin, "Mizoram hrisel leh nuam zawk neih theihna tura Assam Rifles, Project HIMNA-MADAT buaipuitu te, Line department hrang hrangte, kohhran leh NGO te thawh hona a fakawm hle. Mizoram hi drugs leh thil dang dan lo anga tawlhruk na kawng anih avangin fimkhur a ngai hle," a ti.
Healthy Mizoram Campaign hi June 21, 2017 khan International Yoga Day hmanna AR Ground a neihah khan Governor chuan a hawng a, hei hian nakum June Ni 21, 2018 thleng a huam dawn a ni. Hemi programme hnuaiah hian yoga, health, healing, naturopathy, neurotherapy leh drug rehabilitation-ah te hmalak a ni.
Meeting-ah hian Assam Rifles, H&FW department, Education department, Social Welfare department, SCERT, MSACS, Mizoram State Tobacco Control Society leh Aizawl DC Office lam aiawhte an tel a ni.