MGNREGS sum chhui turin BJP-in sorkar laipui an ngen
BJP, Mizoram Pradesh-a Vigillance Cell chuan, Mamit khawpui chhunga MGNREGS sum nuai 50 chuang hman dan chhui chian phûtin nimin khan Union Rural Development minister Narendra Singh Tomar hnenah complaint an thehlut.
Mizoram BJP Vigillance Cell hian kum 2009-2013 chhunga Mamit town area chhunga MGNREGS material component hmanga hna thawh awm leh utilization certificate (UC) sorkar laipuia thawnte RTI Act hmangin a dil a, "RTI Act chhannaa hna thawh anga an sawi, UC pawh Central-a an thehluh vek si hi a hmunah kala enfiah vek a nih hnuah, hnathawh a awm lo tih fianfiah a ni," an ti.
Hna thawh anga sawi, a taka hmuh tur a awm si loh avangin sorkar laipuia Rural Department Minister chu thil awm dan an sawipui tih sawiin BJP chuan, "A thurâwn angin complaint hi thehluh a ni," an ti a; nimin vek khan Ministry of Rural Development hotute chuan Mizoram BJP Vigillance Cell thu thehluh chu an chhui nghal tur thu an rawn hriattir nghal niin an sawi.
Mizoram BJP chuan, BJP-in India ramah sorkarna an chan aṭangin corruption nuaibo tumin prime minister Narendra Modi kaihhruaina hnuaiah chak taka hmalak a nia sawiin, "BJP-in Mizorama sorkarna kan siam hunah Mizoram hi Corruption Free State-ah kan siam dawn a ni," an ti.