Chief Minister-in painting exhibition a hawng

IPR department leh Mizoram Art Development Society (MADS) ṭangkawp chuan SS Art Gallery, Zarkawtah 5th. Solo Exhibition of Paintings by HK Jerry Ramliana an buatsaih a, nimin khan chief minister Lal Thanhawla'n a hawng.

Chief Minister chuan, ram hmasawnna turin mi tinte'n ṭangkaina leh theihna an nei vek tih sawiin, "NEDP hmalakna aṭangin Mizoram chuan subsistence economy aṭangin market economy nih a tum a, market economy-a Mizoram hláng chho turin entrepreneur-te an pawimawh hle dawn a ni," a ti.

Kut themthiamna chi hrang hrang neitute zingah thiamna hlu tak nei, lem­ziaktute pawh entrepreneur zingah an tel tih sawiin Lal Thanhawla chuan, "Eizawnna atan bakah, hauhsak theihna tur leh ramin sum leh paia an intodelhna tur kawng thlengin lemziah hi a pawimawh," a ti a; thiam bik neih leh kutchhuak hmáwrbâwk­na uluk a ṭul thu a sawi.

CM Hawla chuan, ram dang mite'n Mizo pi leh pute sûlhnû an en châk tih sawiin, "Chutih laiin, kan artist-te entawn tur pipúte sûlhnu hluite tihchhiat tuma hmalak tum department an awm ṭhin hi a vanduaithlak tak zet. Ṭhasiama se no neihna hmun, Tuirihiau leh hmun dangte siam dang­lam a ni ṭhin hi a finthlak loh," a ti.

Exhibition-ah hian HK Jerry Ramliana'n water colour hmanga a lemziah 48 pho chhuah a ni.