MPC-in AMC chêt dan an dem

MPC party chuan thuchhuah siamin, tun hnaia Aizawl Municipal Corporation (AMC) sorkarin kohhran leh KṬP-te'n Pathian thu leh nun dan ṭha inkawhhmuhna thu an târ leh hmun leh kawng inkawhhmuhna thu târte an tihchhia chu hriatthiam harsa an tih thu an tarlang.

AMC thil tih vanga Durtlang khaw­tlang leh kohhran mi lunghnur taka awmte chu an lainat thu sawiin MPC chuan, "AMC-a sorkarna chelhtu MNF chêt duh dan râwvâ tak hian MNF-te zia, mipui tithlabár a, rîkrâpna thlen ching an nihzia leh lalna leh thuneihna pawh hmang thiam ngai lo an nihzia a tilang chiang hleah kan ngai," an ti a; MNF chu AMC sorkar pawh keng zo loah puhin, Mizoram pum huap sorkarna chelh tur phei chuan rinna ngam chi an nih loh thu an sawi.

MPC chuan, Durtlang khawtlangin thil tihchhiatte September 2017 chhung ngeia siamṭha tura AMC an phût chu tihhlawhtling ngei turin AMC an phût tih an tarlang bawk.

MPC office bearer-te nimina an pisaa an senior vice president Vanlalhlana kaihhruaia ṭhukhawm chuan ZNP leh Zoram Exodus Movement (ZEM)-te nena an thawhhhona an thlirho nghal a ni.