CM-in MNF ngenna lehkhain a chháng
Mizo Carbon leh Mizoram Lottery chhui chungchanga CBI ko lut tura MNF party mite'n an ngenna chu August 10, 2017 khan chief minister Lal Thanhawla'n lehkhain a chháng tih sawiin Congress party chuan, "CBI koh luh phûr leh cho taka eptu party-te lehkha bawhzui duh mi CM kan nei hi kan chhuang hle," an ti.
MPCC chuan, MNF mite'n CBI ko lut tura ngenna bawhzuia Chief Minister's Office-a nimin chawhma lamah an kal a, CM hmuh an tum laiin, CM Lal Thanhawla chuan, Mizo Carbon leh lottery chiang zawka hriat theih nana CBI chhuitir tura an ngenna August 10, 2017-ah a thehluh thu September 1, 2017-ah MNF general secretary C Lalrammawia hnenah ziakin a hriattir tawh tih an sawi.
Congress party chuan, CM Lal Thanhawla'n MNF-te lehkha hmanga a chhannaah, CBI ruai tur hian ngen nawn a ngaih lo thu MNF-te chu a hrilh tih sawiin, "A theih ang tâwk tâwkin hma a lo la tawh zawk a ni tih a sawi," an ti a; CM hian, 'CBI chhuitir hi kan phûr khawp mai a, thil chhuitir an nih dawn rau rau chuan, kum 1999 aṭangin chhui law law a ṭulin kan hria a, a remchang hmasa berah kan chhuitir ngei ang,' tiin a sawi tih an tarlang.
MNF-te'n CBI koh luh leh thil dik lo nia an hriat chhui tura an duh a nih chuan, tun hnai thil mai ni loin, MNF-in thuneihna an chan laia mipuiin thu dik zîktluak an hriat theih loh - BAFFACOS, Aii Pûk leh ek-in kal thei chungchang te, OPD building bo te, Aizawl Water Supply Phase-II, Tuirial HEP zangnadawmna, police mawza man to leh thil dangte pawh chhuitir CM-in a duh thu MPCC chuan an tarlang bawk.