Mizoram tlawmngai pawl aiawhte'n Citizenship Amendment Bill, 2016 Duh lohna memorandum theh lut

Joint NGO Co-ordination Committee hruaitute chuan, nimin khan Mizoram All Political Party leh NGO Co-ordination Committee hmingin Citizenship Amendment Bill, 2016 duh lohna memorandum sorkar laipuiah an thehlut.

Joint Parliamentary Committee (JPC) on Citizenship Amendment Bill, 2016 chairman Satyapal Singh chuan minister of state aṭanga lakluh a nih avanga chairman nihna a bansan avang­in, Jt. NGO hruaitute chuan memorandum hi Lok Sabha Secretariat-a he bill khawitu ber jt. secretary Kalpana Sharma hnenah an thehlut a ni.

Kalpana Sharma chuan Jt. NGO hruaitute hnenah hian bill duh lohna hi mi 9000 chuangn an thehluh tawh thu lo hrilhin, "Chairman thar ruat vat a nih ka ring a, ruat a nih hunah hmalak chhunzawm a ni ang," a ti.

Jt. NGO hruaitute chuan Kalpan Sharma hi JPC on Citizenship Amendment Bill, 2016-in November, 2017 a state ṭhenkhat an fan hunah Mizoram state lo tlawh ve ngei se an duh thu an thlen a ni.

Memorandum-ah hian Citizenship Amendment Bill, 2016 hman a nih chuan sakhaw zalenna a him loh a hlauh awm thu te, Mizoram chu Bangladesh nena inri a nih avangin Chakma rawn lut rute tan India khua leh tui nihna kawng a inhawn zau thute leh an duh lohna chhan hrang hrang dangte an tarlang.

Memorandum thehluhnaah hian CYMA aṭangin president Lalbiakzuala leh treasurer J Lal­sailova; MZP aṭangin president Lalsangzuala Ngente leh general secretary L Ramdinliana Renthlei leh MSU aṭangin general secretary Lalthanzuala leh fin. secretary B Lalkhawngaihzualte an tel a ni.

Memorandum-ah hian Joint NGO-a tel NGO panga president ṭheuhte bakah political party aṭangin MPCC, MNF, ZNP leh MPC president-te'n hming an ziak a ni.