Zirtirtute Ni hman a ni
Nimin, September 5 kha Teachers' Day a ni a, Mizoramah pawh hmun hrang hrangah hman a ni. School Education minister H Rohluna chuan Reiek MZP-in an khaw community hall-a an hmanna a hmanpui.
School Education Minister chuan, Zirtirtute Ni chu ram chhungah chauh ni lo, khawvel hmun hrang hrangah hman ṭhin a nih thu sawiin, "Ram changkang apiangah zirtirtute hlutna an hre chiang a, an pualin hun an hmang uar ṭhin hle. Ram leh hnam siamṭhatna atan zirtirtute hi hma hruaitu an ni. Zirtirtute hian mi thiam tak tak an chher chhuak a, tun dinhmun min hruai thlengtu an nih avangin zah an phû a ni," a ti.
Zirtirtute dinhmun chu an pawimawh em avangin an dinhmun pawh siam ṭhat zel a nih thu sawiin H Rohluna chuan, "Sorkar hmalaknain sorkar sikula zirtirtu thawk lai, la training lote training tir mek an ni a, chutihrual chuan, sorkar sikul chauh ni lo, private school-a thawk zirtirtu zawng zawng pawh training a ngai tawh dawn," a ti a; zirtirtute chu September 15, 2017 hmaa NIOS-a inziak lut turin a chah.
Reieka Teachers' Day hmannaah hian Reiek MZP-in an khua zirtirtu ṭha bera an thlan Lalchhuanawmi hnenah chawimawina hlan a ni.
Minister PC Lalthanliana chuan DIET, Lungleiin Zirtirtute Ni an lawmna a hmanpui a; thu sawiin, tun hma chuan zirtirtu training mumal nei loin naupangte an zirtir ṭhin tih a sawi a, "Tunah chuan zirtirtute training chu zirtirtu hna zawm hnu (in service) ni tawh loin, zirtirtute'n hna an zawm hma (pre service)-in sorkarin a kalpui tawh a, hei hian naupangte zirnaah hma a sawntir phah hle a ni," a ti.
PC Lalthanliana chuan, zirtirtu ṭha ni turin inbuatsaihna neih a ngai tih sawiin, "Nakin lawka zirtirtu ni tura buatsaihtu zirtirtute hi ngaihluin chawimawi thiam ila, kan hnam leh ram tan hmasawnna tam tak a thlen dawn a ni," a ti a; DIET-a zirlaite chu taima taka zir turin a chah.
MLA Joseph Lalhimpuia chuan Baptist Higher Secondary School (BHSS), Lungleiin Zirtirtute Ni puala inkhawm an buatsaih a hmanpui.
Lalhimpuia chuan, zirnain hma a sawn theih nan sorkarin ṭan a lak dan sawiin, "Nikum thleng khan middle school leh high school-ah science leh mathematic zirtirtu bik kan nei lo a, sikula thawk zinga a ti thei awm deuhte'n an zirtir ṭhin. Nikum aṭang khan sorkarin Recruitment Rules thar siamin, science leh mathematics zirtirtu tur bik a la ṭan a ni," a ti.
Champhai DC Vanlalngaihsaka chuan GM HSS leh BC English Academy-te'n Zirtirtu Ni puala inkhawm an buatsaih a hmanpui. Vanlalngaihsaka chuan, zirlaite chu zirtirtute thu âwih tura chahin, "Mobile phone leh internet-te zirlai tana ṭangkaipui tlaka chhawr a pawimawh. Hnam dangte laka Mizote kan himna tur chu zirna a ni a, hnam lian zawkte laka ro kan rel ve theihna turin all India service-a luh kan tum a ngai," a ti.
Champhai DC hian Champhai District Education Committee aiawhin Mizorama zirtirtu thawk ṭha atana thlan state awardee Lalthantluanga, GM HSS hnenah chawimawina thuziak a hlan.
Mamitah pawh Zirtirtute Ni pualin Chhimveng YMA Hall-ah hun hman a ni a, DC Lalbiaksangi'n a hmanpui. Mamit District Legal Services Authority-in an district-a zirlaite puala essay inziahsiak an buatsaiha ti ṭhate hnenah lawmman hlan a ni.
Teachers' Day hi Mizorama sikulte'n an remchan dan angin an hmang hlawm a; zirlaite'n an zirtirtute chawimawina thilpek an hlan bakah, intihhlimna hunte hman a ni.