Parliamentary Secretay-te senso cheng vaibelchhe 18.81 - PRISM

6th September, 2017

PRISM chuan nimin khan an pisaah parliamentary secretary ruat an nih avanga Mizoram sorkarin sum a sên zat an chhût a, cheng vbc. 18.81 chuangin an chhût. PRISM chuan, parliamentary secretary vanga sum sênte chu rûl turin Chief Minister an phût.

PRISM hian parliamentary secretary-te senso chu thuthar thehdarhtute hmaah an chhût a; an president Vanlalruata chuan, "Mizoram Parliamentary Secretaries (Appointment, Salaries, Allowances and Miscellaneous Provisions) Act, 2009 hmanga parliamentary secretary 13 kan neihte enkawlna atana Mizoram sorkarin mipui sum a khawh ral thlawn kan chhût theih chin chu Rs. 18,81,51,159 a ni," a ti.

Parliamentary secretary-te senso chhûtnaah hian an car pahnih leh an private secretary-te car pakhat leina senso leh lirthei thawm ṭhatna leh enkawlna senso chhût a ni lo.

Parliamentary secretary-te'n a thlawn veka an hman theih telephone leh internet, kawlphetha leh tuite chu MLA hman theih chin angin an chhût thung.

Vanlalruata chuan, Public Servant Personal Liability Act, 2010 chuan ṭul lo leh ṭangkai loa mi chhawr a khap tih a sawi a, "Danin a phût angin parliamentary secretary-te enkawlna atana sum sen hi anmahni ruattu Chief Minister-in a rûl ngei tur a ni," a ti.

Mizoram sorkar chuan kum 2008-2013 khan parliamentary secretary paruk a ruat a, sorkar term kal mekah chuan pasarih ruat an ni. An senso hi parliamentary secretary ruat a nih tirh aṭanga tun hnaia banna an thehluh hma inkar a ni.

MLA-te neih loh parliament secy-te'n
An neih leh kum khata an senso zat
Sum senna Thla khatah Kum khatah
Discretionary Fund (kum khatah) - Rs. 3,00,000
Driver pahnih Rs. 15,269 Rs. 3,66,456
Private secretary (Group-A officer) Rs. 55,000 Rs. 6,60,000
PS driver pakhat Rs. 15,269 Rs. 3,66,456
UDC pakhat Rs. 38,000 Rs. 4,56,000
LDC pakhat Rs. 32,000 Rs. 3,84,000
Computer/data entry operator pakhat Rs. 16,000 Rs. 1,92,000
Peon pahnih Rs. 6,800 Rs. 1,63,200
Household peon pathum Rs. 6,800 Rs. 2,44,800
Car POL thla khatah litre 40 - Rs. 28,800
Back-up POL thla khatah 40 - Rs. 28,800
PS POL - Rs. 36,000
Total - Rs. 29,75,412
Note: Official car pakhat, back-up car pakhat, private secretary car pakhat, car enkawlna leh travelling allowance-te an chhut tel lo.