Sailulak YMA-in Platinum jubilee an lawm

Sailulak Branch YMA chuan nimin khan an khaw community hall-ah an kum 75-na, platinum jubilee an lawm a, bial­tu MLA Vanlalawmpuii Chawngthu, Mizoram State Women Commission chairperson-in a hmanpui.

Vanlalawmpuii Chawng­thu chuan, Mizo ṭhalaite chu hmui chauh­a nationalism sawi lo a, thinlunga nationalism nunpuitu ni turin a sáwm a, "Kan ram leh hnam humhalhna kawnga hmalak meknaah thâ thlah loin ṭan la thar zel turin YMA member-te ka chah duh che u. Mizote chuan Mizoram lo hi hawna tur kan nei lo tih hriain, kan ram neih chhun hi i hmangaih thar ang u," a ti.

Ṭhalaite chu nupui/pasalah hnam dang nei lo tura chahin, "Kan hnam tlemtê hi chîm rala kan awm loh nan mahni hnampui ngei nupui pasalah i nei ang u. Hnam dang tlangval hausa tak ai chuan Mizo mipa inhlawhfate an hlu zawk," a ti. Ruihhlo do kawngah ṭan zel tura a chah bakah, aia upa zah kawngah ṭan la turin a chah a, Hnam fing leh changkang apiangin aia upate an zahthiam a, YMA chhang aṭanga inzirtir tam a pawimawh," a ti bawk.

Sailulak branch YMA hi September 5, 1942-ah din a ni a, member mipa 401 leh hmeichhia 280, an vaiin 681 an awm mek a ni.